روح واْرحل..بس تكفى لا تطيح
من عيوني واْنت تسوى شوفها
يكفي ان القلب باْسبابك جريح
والهموم اتلوفني و آلوفها
ما تشوف الدمع من عيني نضيح؟!!
والمنايا كل ليل اشوفها؟!
لا ضويت المرقدي كنّه ضريح
وكن روحي قاربت لحتوفها
وصدري اللي ضاق به كون/ن فسيح
من حظوظ/ن كم طال اوقوفها!!
والضلوع اللي من احزاني تصيح
كل ليله والهموم اظيوفها
ادري انك سالي وقلبك مريح
وتقطف اثمار السعد واصنوفها
روح وارحل بس تكفى لا تبيح
دم نفس/ن كان لك معروفها
للزمن وجهين: مملوح وقبيح
وقسوة الدنيا بتعْقب روفها
لو تشوف بدنيتك يوم/ن مليح
تجبرك الايام تعرف عوفها
ما يصح بهالزمن غير الصحيح
جرب الدنيا وشوف اصروفها!!!