|
تكون البنت لابن العم ورغبات الكبار تصير
السلام عليكم ورحمة الله وبركاته
دعَتـني وجيت للموعد وكنت مْن الفـرح كالطيـر
وجيت من العصر طاير مع ان الموعد المغرب
وجتني بس مدري ليه شعرت الجيـّة هذي غير
وهي تقرب من عيوني شعرت إن الممات أقرب
وقلت الله يهوّنها عسى في جيّتـك لي خير
انا من شفتك أقبلتي وانا خايف ومستغرب
على كثر الحكي مدري كأنّه خانها التعبيـر
وقالت لي جُمل وأشياء لا تكتب ولا تعرب
هدت فجأة تطالعني وأنا في حاجة التفسيـر
لجل نحكي بهدوء اكثر سألت: الحلوة وش تشرب ؟؟
ـ صاحت بي انا أحبك ولك في هالحشا تقدير
وتدري ان المثل فيـنا وفي احساسنا يُضرب
وكنت انت الوفي وانت البري من تهمة التقصير
ولكن ذي عوايدهم من ايام وزمن يثرب
تكون البنت لابن العم ورغبات الكبار تصير
وتدري الاقربون اولى .. مع انك للخفـوق أقرب
وتدري للقدر كلمة.. لعادات الأهل تأثير
لذا أرجوك تتركني وانا من واقتعك باهرب
شعرت بحكيها كنـّه قصاص وامر بالتعزير
شعرت الدنيا ضاقت بي من المشرق ليا المغرب
مشت خلّت وراها طفل ما يدرك وش التدبير
يحسب ان الغرام أشعار شاعر واغنية مطـرب
ضحكت وماقدرت اني ألاقي لضحكتي تبرير
من اللي بوقـتنا مرّه ضحك من لدغة العقرب
رفضت أستوعب اللي صار ولا استسلمت للتغيير
ثمان سنين اجي نـفـس المكان بساعة المغرب
ورغم ان الثمان سنين جرح وكلفتني كثيـر
أنا لليوم أجي وأدعي.. تجي يارب .. تجي يارب
ممآ رآق لي
|