ياونتي ونة كسير الجبارةْ

إلى وقف ما احتال وليا قعد ونّ

عليك يا شباب ضوّ المنارةْ

عليك ترفات الصبايا ينوحنْ

من عقب عبيد قلنا ودَاره

لاَ باكي عقبه ولا َ قايل منْ

تبكيك صفرٍ البسوها غَيَارهْ

تبكيك يوم ان السبايا يِعَنّنْ

وتبكيك وضحٍ ربّعت بالزبارهْ

اليا قِزن من خايع ما يردنْ

الخيل عقب عبيد ما به مناره

وش عاد لو راحن وش عاد لو جن

يا شيخ ما تامر عليهم بغاره

كود الجروح اللي على القلب يبرنّ

يقطع صِبِيّ ما ينادي بثاره

إلى أقبلن ذولي وذُوليك قفنْ

ياهل الرمك كل يعسف مهاره

والمنع ما نطريه لاهُم ولاَ حن

ضيف الله اشرب ما شربنا مرارهْ

اصبر وكنّك شالحٍ يوم حَزّنْ

راح الفديع اللي علينا خساره

واخذ قضاه عبيد حامي ثقلهنْ

يمنى رَمَتْ به ما تجيها الجباره

اللي رمت بعبيد في معتلجهنْ

من نسل ابوي وضاري للشطاره

يصيب رمحه يوم الارماح يخطِن

وعبيد خِللّي طايحٍ بالمغاره

عليه عكفان المخالب يحومن

وعادتنا بالصيد ناخذ خياره

ثلاثة الجذعان غصبن بلا مَنّ

يا قاطع الحسنى ترى العلم شاره

لابد دورات الليالي يدورنْ

حريبِنا كنّه رقيد الخباره

خطرٍ عليه اليا توقظ من الجن

ماني بقصادٍ بليا نمارَه

أجدع نطيحي بالسهل وإن تلاقن

من حل دار الناس حلوا دياره

لابدّ ما تسكن دياره ويغبَنْ

ومن شق ستر الناس شقوا ستاره

ومن ضحك بالثرمان يضحك بلا سنْ

وان كان ضيف الله يعسف مهاره

فمهارنا من عصر نوح يطيعن

تِدنَا لِصِبيانٍ سُواةِ النماره

شهبٍ لماضين الفَعَايل يعَنّنْ