ذيب عوى وانا على صوته اجيب

ومن ونتي جضت ضواري سباعهْ

عز الله اني جاهل ما أعلم الغيب

والغيب يعلم به حفيظ الوداعهْ

يالله يا رزاق عكف المخاليب

يا محصيٍ خلقهْ ببحره وقاعهْ

تفرِجْ لمن صابه جروحٍ معاطيبْ

وقلبه من اللوعات غادٍ وِلاَعِهْ

صار السّبب منّي على مَنقعَ الطيب

ونجمي طمن بالقاع عقب ارتفاعهْ

ياطول ما هجّيتِهن مع لواهيب

ولانِي بَداري كسرها من ضلاعِهْ

وياطول ما نوّختها تصرخ النّيب

وزن البيوت اللّي كِبارٍ ربَاعهْ

واضوي عليهم كنهم علي معازيبْ

إليا رَمَى زين الوَسايد قناعهْ

أبا انذر اللّي من ربوعي يبا الطيب

لاياخذ الا من بيوت الشجاعهْ

يجي وَلدها مذرّي كنّهَ الذيبْ

عزّ لبُوه وكُل ما قال طاعهْ

وبنت الردى ياتي ولدها كما الهيب

غبنٍ لبُوه , وفاشلَهْ بِالجِماعهْ

ياكبر زُوله عند بيت المعازيب

متحَرّيٍ متى يقدّم متاعِهْ

إن كان تنشد يالهويدي عن الطيرْ

الطير والله يالهويدي غَدَ لِي

طيري عذاب معسكرات المسامير

إن حل عند اقطِيّهن الجفالي

إن جاء نهار فيه شرّ بلا خير

وغدا لهن عند الطريح اجتوالِيْ

إن دبرن خيل وخيل مناحير

وغدن مثل مخزمات الجمالِيْ

على الرّمَك صيدهِ عيالٍ مناعير

وشره على نشر الحَريب الموالِيْ

يضحك ليا صكّت عليه الطوابير

طير السعد قلبه من الخوف خالِيْ

خيّالنا وإن عرجدنّ المظاهِير

وزيزوم عيرات طُواها الحيالِيْ

غيثٍ لنا وان جت ليالي المعاسير

وبالشح ريفٍ للضعُوف الهزالِيْ

يسْقِي ثَراه من الروايح مزابير

تمطر على قبر سكن فيه غالِيْ