مدخلـــ

حاكنى بالله واصدقنى الهروج
///// انت تبينى مثل ما قلبي يبيك

ارسن الافكار لجلك فى سروج
//// وامتطيها شعر من شانى اجيك

الصدر ضايق والمزاج متعكر
والليل لا اقبل جاب معه الهواجيس


أجمع الم احزان وهموم افكر
والنوم عفته من كثير الكوابيس


وان بان نور الصبح مابه تنكر
اجاوب الورقا على الصوت ياقيس


من يوم صار الباب عنك امتسكر
وحواجز الفرقا بقلبي محابيس


اعيش دونك صعب يوم اتذكر
أرسم أمل ليله نعيشه معاريس


من عاش طعم الشاى من دون سكر
من سامر الظلما بليا فوانيس


من يرجي الوسمي به العشب بكر
مثلى وهو عارف رصيده وساويس


وان شفت رمش ٍ مثل طابور عسكر
يكسر حواجز سور كسري وبلقيس


افقد وعي حشاش مدمن ويسكر
ان فاح عطرك مع هبوب النسانيس


اجيك كلي ماعرف الفر والكر
تموت عن غيرك جميع الاحاسيس


حرٍ ولانى من على الكف وكر
من لابتى شمر عيال السناعيس


شبكتك بقلب ٍ ضلوعه معسكر
مايحكمه غيرك بحنكه وتأسيس