ياطيـر ياللـي تنـوح وترتدي غصـنـي
مليت وانا انتحـر فـي .. طـرس اقلامـي
(زدني من النوح واسعدنـي علـى حزنـي)
لملم بقايا عنـاي .. و .. ضيعـة احلامـي
امس الضحى ايقنت ب ان الطيش ما يعني :
سوى .. مواطن هواوي .. في : بلد نامـي
يامزنـة الديـم .. يـا .. ديمومـة المزنـي
ي الهام كل مصدرٍ .. يا .. مصـدر إلهامـي
غفيـت فـي وجنتيـك .. ولا تواخذنـي
!الشوق هـذا لئيـم !.. وميسمـه دامـي!
كذا ويكفي .. بـلاش تقـول : واحشنـي
باين عليـك تهبـا .. وصويحبـك ظامـي
عديت انا الذكريات .. فـ/ رجمـك المبنـي
وتليت عود الضلوع .. فـ/مرقـب حامـي
وشلون اخبيك عن عيني ؟ .. وانـا جفنـي
كل ما يِكّـت النظـر .. ينبتـك قدامـي
وش عاد لو ضاق يالسجـان بـي سجنـي
كفٍ تبينـي سجيـن وكفٍ محـامـي
مادامني كــل مــا مـيّـلـت تسـنـدنـي
وش نيتك في خويك ؟.. يـا مـلا الغامـي
يا ابلغ من الضاد .. وسـط الجامـع المغنـي
وألطف من الغيم .. لا نسنس هـوا شامـي
وأعذب من النيل لو يزعل علي حسني
وأحلى من أحلى هدف من حرفنة سامي
يازهرة الزنبقه.. في منتجع زدني
وش عاد باقي من أيامي لأيامي
ياسخف هَالنـور هـذا جانـي ومجنـي
كل ماسطع بالشحوب و .. دوزن اوهامي
اصغِ إليّ.... اذا انك ( لسا فاكرني)
الشـــوق هذا غريب وحيل متنامي
يمكن امـرك تـرا بكـرا .. و .. آخذنـي
خايف علي مـن عبيـرك يشهر اعدامـي
انتَ .. ف عطرك .. تسوق الغيـم يمطرنـي
وانا بالاجـواء هـذي : واحـد اجرامـي
اسرفت فيني وانا ما قلـت لـك : عطنـي
حسبـي عليـك وعلـى تغريبـة اقدامـي
خلاص .. يكفي .. دخيلك .. لا تواعدنـي
مغري .. وانا ما انتبهت ل عضـة ابهامـي
تصبح علـى خيـر .. يالله قـوم ودعنـي
من ميلة عقالي .. لين .. البـرد ب عظامـي
عقاب الربع