.

ما برد عزمي ولا غيّر لهيـب الحـب لونـي \ دام لي قلبٍ من عروق الوفـا يسقـي وريـده

والهوى حظ ونصيب ودمعتي عـذرا جفونـي \ وللجفون سلوم والدمعـه تخـاف مـن النقيـده

ليه يا من تسرقين الود مـن نظــرة عيونـي \ ما حسبتي غيبة اللي لا نوى الغيبـه .؟ فقيـده

وليه لا عزّمت ابنسى من على الدنيـا نسونـي \ ما ذكرت الا انتي وجـرحٍ مساحاتـه عديـده

ليت عذرك عن وفاك وغلطتك يلغي شجونـي \ وليت لي قلبٍ بدون احساس واحكامـه شديـده

كنت اظنك ما تعيشين العمـر لحظـه بدونـي \ واثر ما للظن غيـر اللـوم ولحـون القصيـده

اذكريني .. كل ما فاضت عيونـك وإفقدونـي \ وكلّ ما دمعك نشد خدك وقال .. شصار بإيـده

واذكريني .. لا غزا البرد الضلوع وما لقونـي \ ولا جبرك الوقت في ممشاه واطباعـك عنيـده

واذكريني .. كل ما جاتك من العالـم لحونـي \ عقب ما كنتي مـن لسانـي تعرفيـن الجديـده

واذكريني .. كل ما احتجتي تخونيني .! وخوني \ في غيابي .. كل ذكـرى بيننـا كانـت سعيـده

والا انا لا من ذكرتك .. ما ذكرت الا طعونـي \ فالزمـان اللـي تجمّعنـا بـه الله لا يعـيـده

ما ربحت الا جفاك وما خسـرت الا جنونـي \ ولا بعد هذا سوى النسيـان و الفرقـا الاكيـده

سامح الله غلطة احساسي قبل غلطـة عيونـي \ وسامح الله هاجسي في ما هدا لك من رصيـده

لو ظنوني يوم واحـد تشعـر بخيبـة ظنونـي \ ما يصير الحزن سيد الصدر وافراحـي عبيـده

سامح الله ذنب كلّ اللي على الضيقـه حدونـي \ لين صرت اواجه الايـام فـي بسمـه وحيـده