الله يجمّل ها لقصيدة في عيون الغالي


وإنّه يجمّلني ولا يخلف عليّ اليمّه


أصدق قصيد اللّي كتبته في خلاي الخالي


في أمّي وأنا صادق قسم بالله (دين وذمّه)


ماهي بنقالة حكي (وش قيل وش إنقالي)


ماتعرف الزيفه ولا تعرف تقول النمّه


أصدق من خيال المزون الماطر الهمالي


وأطهر من مياه العيون إلاّ أطهر من اليمّه


أمي إذا من الليالي ضيّقت لي بالي


تهديني الفرحة وتأخذ من خفوقي همّه


تحمّله طيش الطفولة والشقى وهبالي


لوّي شقى منثور جاته بالحنان تلمّه


أمي غلاي بعينها عالي وقدري عالي


وأنا مسكّنها الوريد وساريه في دمّه


يارب قدّرني على رد البرى يا والي


والواجب اللّي في حقوق الوالدين أتمّه


والجنة اللي تحت ماطى الأمّ هيئها لي


فضلك ولا فضل السفيه إبن السفيه الرمّه


أمي وما أجحد فضلها بقفاتي وإقبالي


أقبّل إيديها وأقبّل راسها وأضمّه


إن مرّ بي يومٍ ولا شفت الحبيب إقبالي


تضيق بي الدنيا وصدري ينقبر في غمّه


فدى عيونك مالي إلاّ مفتديك بحالي


قدرك كبير وقيمتك عندي تساوي أمّه


من دون شوفك بس أنا وشهو الذي يبقالي


ياقبلة الدنيا ترى الدنيا بلاك مرمّه


يا قبلة الدنيا ويا ظلّي إلى يا ظلالي


يحرسك ربي من صواديف الزمان وسمّه


الشعر ما يرفع نزيل ولا ينزل عالي


مساوئه جمّه وحسناته مثلها جمّه


واليوم أحسّ إني بشعري ارتفع منزالي


حتى ولو إن القصيدة بس كلمة (يـمّـه)