[poem=font="simplified arabic,4,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]

شاب راسي من عالم ماعرفت له اتجاه=مـن تحرينا به العقل عود للجهل
الصغير يهمل العود ما يسمع حـكاه=والكبير إلا حـكا قلت سـنه مـا كمل
لو تخاطب طاعن السن تبحث ما وراه=شفته أصغر عقل وادراك من عقل الطفل
كلهم مـن صاحبه واصل غيضه مداه=ويجعلون الكلمة الهينة كبر الجبل
كان ما بريوا فأنا طالع منهم براه=من جفته الدار شلـع خيامه وارتحل
تصعب العيشة مـع عالم هذا مستواه=كـل شي تجـتهد فـيه تأبى بالفشل
كل ما قلت انت حضوا على فرض الصلاه=فتشوا دعواك واللي مضى لك من عمل
ما يعرفون القـوانين وسلوم الحياه=يظلمون ويبهتونك بشي ما حصل
والرفيق اليـوم يشتك في زاده وماه=لو تجيب له العسل قال لك ما هو عسل
الحليب أبيض وهو داه من تحت الدواه=لو تذوقه ذوق ياتي لك بسبع العلل
كـاتم جـوه ومتغير عندك هـواه=وانت لاازعلته ولاجيت في درب الزعل
لا يبي شوفك ومعروفك الماضي نساه=عقب ماهو كان يضرب برفقتك المثل
عقب ما انا افرح بشوفه ويسعدني لقاه=انتزح من عقب ذيك المحبة واعتزل
لو تجي تهديه وتحاوله يفهم خطاه=لا تأثر في كلامك ولا عنده زمل
ما تعرف الرجل ويبين طيبه من رداه=كون بالشدة يبين الحديد من الذحل
الله أكبر كيف ترجي سحاب من سماه=عالم عما يقولون ما فيهم خجل
الفتى لا قل دينه وقل الله حياه=جات به نفسه تقوده على شين العمل
كل مـن وده بفرقاك لاتجري وراه=عنه غير خط ممشاك والدنيا سهل
من تنزح عن جنابك وبين لك جفاه=لو تعدل يابس العود ما زيد انعدل
كم هبيل في عروض البشر تدرج رحاه=كل ما جيت انت تطفي محركه اشتغل
كل مانورت دربه يعود في عماه=حطك انت مضيع الدرب وهو اللي يدل
وابن عمك لا تقول إن معك منه غناه=غير عنه احفظ لسانك ورجلك لا تزل
الضعيف يروح حقه وينزل في حماه=لا تضاعفكم خصيم بساحتكم نزل
ادمح الزلات والعيب لا تكشف غطاه=خله يساعد زنودك على حمل الثقل
إن نواك بقطعة الوصل لا تقطع رشاه=التفرق ذل والعز في جمع الشمل
خاب ظـني في رجال لهم وجه وجاه=لا سأل هذاك عن ذا وهذا ماسأل
عيشة الوحـدة للإنسان ما فيها طـراه=مادرى انه بيتوفى وشغله ما كمل
[/poem]