"الـثـيـاب"
يا اللي تشوفين الثياب
انا ذنب.. وعيونك ثواب
لا تجرحين الطين
ينزف لهب..جرح التراب
ينزف شهاب.
يا صوتي المبتور
لي خافقٍ من نور
مكسور
واقف على الإبواب.
من يأمن الريح
من يأمن القاسي إذا أجهش..يصيح
ومن يأمن الريح
ياللي تنادين العيون
كل العيون اختارتك
يا منتهى الهرج..بجنون
كل الشفاه اختارتك
وصرتي حكاة عيونهم
صرتي عيون حكاتهم
إلين جا..وقت الغياب
وانا..ادور عن جواب
ليه..بس تشوفين الثياب؟!



"الـعـاشـق"
العاشق.. اول طفل او آخر انسان
قلبه ..مثل نفح النسايم على الما
العاشق..اجمل طير له كل الالوان
سموه طير الروح..تفداه الاسما
وجرح الظنون عيون..عنوانها كان:
تسرح بعيد..ولجلها الجرح يظما
ولو عذبت قوافلي ..كل الاوطان
وشلون اباصلها .. وانا دربي اعمى
كان الامل بالوصل ..له ضوح دخان
انا غدى صدري..رمادٍ وظلما
احلى شعور..معانق يدين خلان
فيه الكفوف قلوب..والروح تسما
واصعب شعور..وداع واله..لولهان
منه العيون تخالط الدمع بالما



"حـلـوة انـتـي"
ان حكت.. غار السكوت من الحكي
وان بكت..يحسد مدامعها السرور
كنها والشمس ..خصم ومشتكي
وبين ذيك وذيك..عذبت السطور
حلوة انتي..والحلى شبه بكي
ومن شذاك اختالت ازهار العطور
والجمال مرايته في وجهكي
والبها..له في جفن عينك..فتور
يا غريرة ..يا غروري مسلكي
تهت ولا تاه عن كف العثور
في طريقٍ ضاعت الخطوة لكي
ما تميز بين نار وبين نور