ماااقول انا من لوعة العشق مرتاح
........وان قلت ضايق ابتسمت بـ حراره

بسمه وتكتب بالبحر( وين الافراح )
........حتى تيقنت بـ غباء العباره

الذنب موجه والعذر زند سباح
........والملح طايش والعطش بي شراره

ياقلب لاترجي مقفي اذا راح
........هذا قراره ..واحترامي لـ قراره

اقطع تذاكرنا على رحلة جراح
........سياح نرحل في ربوع المراره

مدامني وياك قفل ٍ ومفتاح
........خل الحبيب يفك معنى الاشاره

وان صادف الايحاء جمره ولا فاح
........اعرف بـ ان العشق فيني خساره

لو الخساره تشتكي موت الارباح
........ماكان ضاقت بالامير الاماره

يا قلب تدري عن سبب قرب الارواح
........والا كذا دربك مطول مساره !

تدري وشـ اللي يجعل العشق ذباح ؟
........بنت ٍ تحبك بـ ارتياح واثاره ..!

وتدري وشـ اللي يجبر البنت ترتاح ؟
........بسمة رجل ممزوجة ٍ بالطهاره ..!