تخيل تزرع ورودك على الغيمة وتقطفها

وتهديني أنا وردة وأخليها على خدي

وتالي تمسك الغيمة تقولي يالله اوصفها

وأشبَهها على قلبي ويطلع لونها وردي

ونسبح في الفضا والأرض نبعد عن مشارفها

ونضحك للنجوم الساهية ونطير ونعدي

ويعزفنا الغلا ألحان تطربنا معازفها

ويلهمنا الشعر أحلا الحديث الهامس الودي

ونهدي للثريا نجوم أحلا عن وصايفها

ونهدي للبدر هالة تفوق الوصف وتعدي

وتغمرنا المحبة حب وتلهبنا عواطفها

وتسألني عن شعوري وأقول الله من قدي

أنا أسعد بشر وأنته أعز الناس والطفها

واغلى حب في قلبي عزيز وغالي عندي

وتالي تاخذ الوردة تبي تمزح وتحذفها

وتمسك لي يدي وأصحى وألاقيها على خدي