حبت أنا اشارك الاخوان بهذا الموضوع الجميل واخترت لكم شاعر له مكانته
الشعريه هو شاعر اعطى التراث الشعري نوعاً من القدرة الشعرية والتميز
الخاص في تطويع المفردة لصالح المعنى في اطار ديباجة يحس بها المتلقي
هو الشــــــــــــــــاعر /غازي بن دخيل الله بن عون الرويس العتيبي

اترككم مع هذه الباقة من قصائد شاعرنا عسى ان تنال استحسانكم


عزة النفس

أنا ما لقيت اللـي يشاركنـي الأحسـاس
من الساحل الشرقي ليا الساحل الغربـي
و من حدها اللي من ورى قصر بن هباس
ليا أقصى الطوال اللي جنوب عن الدربـي
ترفع مزاجي عن مزاجات بعض النـاس
ورفض عقب مسكان الرفـاع يتحدربـي
عن المنزل اللي فيه للساقطيـن أونـاس
لـدار المعـزه والعزيزيـن سافـربـي
زراج قفر ما جاه لهـل الـردى عسـاس
و لا دوجـت بربوعـة الهيـم والجربـي
مزاجي كما طيـر ليـا هبلـه نسنـاس
عن أرض المذله في سما العز يشهربـي
يحلـق بجـو العـز تحليقـة القرنـاس
عن الشرك يم ديـار الانصـار هاجربـي
طمحت لحديث بن عمر هو وبن عبـاس
وهجرت الرياضيات والجمـع والضربـي
ليا وردو انذال المـلا عقلـت الانجـاس
مزاجي مـع المظمـاه عنهـا يصدربـي
لو العز بحـر ٍلالتطـم يغـرق الغطـاس
رسابي مزاجي فـي موانيـه وابحربـي
اجنب يميـن عـن المناقيـد و الادنـاس
وخلـي طريـق ٍللـمـلام يتياسـربـي
انا مع طريق اللي لهم فالدجـى نبـراس
هذا دربهـم وانـا علـى دربهـم دربـي
اقـص الاثـار المستجـدات والــدراس
تقفيـت اثـر وافيـن الاشبـار والثربـي
و عن منهج ٍ سارو معه مارغب المنكاس
تسهـل معـه ممشـاري ولا توعربـي
وانا حالفٍ بمكـون الـروح و الانفـاس
ومرسل خيار الخلق من خيـرت العربـي
ما تصغ المسامع للمطامع ولا ارخ الراس
ولـو كـان كـل ٍينتقدنـي ويسخـربـي
اقاس الظروف وسمعتي كنها القرطـاس
ولا اطلب جميل البوسنه لا ..ولا الصربي
وقل ٍتسوده عزت النفس مـا بـه بـاس
ولا خضع يا كود لكاشف الضر والكربـي
لو ارخي عزيز النفس لجل الذهب والماس
بقت وصمةٍ لاحـل بـي ذكـر وتذكربـي
هذا هو طريقي والبشر والعقول أجنـاس
وكل ٍ له أرا ولـه منهـج ولـه دربـي

القـــــهوة

ياريــف قلــبي للمســايير قــم شـب
وحــط المناره في طــويـل الظـلالـي
عقــب تشــق الها لجــزل الحطــب جــب
وهـات النجــر واحضـر جــداد الـدلالي
ثــلاثٍ الهــن راعــي الكيــف يطـــرب
وســوطهن ضمّــــر والأخـــر جــلالي
وابطــونهن مـا اخـــذن اســـبوعٍ عـن الــرب
وجنــوبهن صفــــرٍ تـلالا تـلالي
والرابعــه ملقامــة لـونها اصهـــب
حيــث انها للنـــار دايـــم تصالي
فليا جبــت كــل اشــــروطها اللي تطلـــب
اقعــد عليـــها يازعيـــم العيـــالي
واحمــس لنـــا بـريــة حبــها اشــــهب
وبــهارها هنــدي ومـــاها زلالــي
واعــرف تــرى قــانونها ما يخـــرب
ونـدارها ينقــى ومـــاها يكـــالي
وتــراه ما يصلــح لها كــل مــذهــب
ولا تقبــل الــراضــه ولا الأعتجـــالـي
واليا حمسـت احـرص على حمسة الحب
واعـرف تـرى الحمسه تبي وسع بالي
تــاخـذ على ادنى الجمــر فتــره تقلـــب
لين العــرق يطلــع ســواة اللــوالي
ومـن يـوم يطلـع فالمبــرد لـها كـــب
ليــن النــدار الكــان فيها يشــــالي
واليــا خــذت مقــدار للنجــر قــرب
ودنــه بصـــوت يســــمعه كـل غـــالي
دنــه وخلــه للمســـاييــر يجــذب
لا قــام صوتـــه للنشـــامــا يـــلالي
يوحــونه الجيــران لاقـــام يقنــب
يوحيــه الأقصــى والقصيــر المــوالــي
وعقــب تــدق البــن لقــم وركـــب
ليــن انــها تســـمح مـن الأجتـــوالي
وقبــل تبهـــرها عـن النــار تجــذب
وتركــد شـــويه ليــن يصفــي الحثـــالي
وبرويــد فـي حــدى المبــاهير تســـكب
ومن عقــب غــال الهيــل فيها يهـــالي
واعــرف الـيــا بهـــرتها يالمشـــبب
تــراه يكفيــها مــن النــار صـــالي
ثـم اجــذها مـن يـوم للهيــل تقلـــب
ومن يــوم تركــد صبــها للــرجــالـي
حتى يجــي الفنجــال منها اليــا صـــب
بيــن الشــقار وبيــن لــون الشعالي
اما اشــقر رايــب مثـل بـول الأرنــب
والا اشــعل يشــدا لـدم الغـزالي
يطــرب لها مـن كـان للكيــف يطــرب
كيــف النشــاما اللي مـن العـب خالي
واعــرف تــراها عــادة ما تســـيب
ولا ينتقــدها الا قصـيــر الحبالي
واحــرص تخلــي عــادة الجد والاب
ما هــم عليــه اول عليــه انـت تالي
تــراك مـن كــل المناســب معــرب
ما بيــن جــدان وعمــام وخـــوالي
وابيـك عن منهاجـهم ما تجنب
انكان فكنّـك بنات الليالي

غزلـــــــــيه

وراك يـا تـرف القـدم مـا تسلّـم
كّنـك بمـردود التحيـات شحّـيـت
عسـاك مانتـه للهجــر بمتعـلـم
وعساك لهروج الشماميت ما صغيت
كانـك لدقـات الـوشـاة متـولّـم
تبي تخطيبي ولو كان مـا اخطيـت
يا صاحبـي خـل الطريـق المظّلـم
وامش الطريق الّي مثل موضي اللّيت
حتـى المـودّه حصنهـا مـا يثلّـم
لو لغّمـوه اهـل الـردا بالدناميـت
وسلّم على صاحبـك لـو مـا تكلـم
وانا فهمه لو مـا تكلمـت واوميـت
العيـن بالـسـر المخـبـأ تعـلّـم
ليا أطرقت بالسود المظاليل وغضيت
وانـا علـى سـرك حصـانٍ مبلّـم
ما كّنها شافت عيونـي ولا وحيـت
وكانك مـن اللّوعـات مثلـي تألّـم
لا تقطع اسباب الرجا عقب ما أرهيت
وانـا ابـك حتّـى فالمنـام اتحلّـم
حسيت بالهجـران منـك وتجافيـت
ولو للهوى يـا زيـن قـاضٍ معلّـم
من يوم في طيشك وغيـك تماديـت
طرشـت يمـهّ مـن جفـاك اتظلّـم
لين اخبره باللّي بصاحبـك سويـت