يا صاحبي رح قلها ترحـم الحـال
وانا بشر ماني عن الموت مصيون
رح قلها مسفر لو البعد بـه طـال
يمكن يعود تالـي الوقـت مجنـون
لتقول لي هـذي سواليـف جهـال
واسمع كلامي للنهايـه ولا تهـون
بعض الغلا ما ينوصف لك بالأمثال
لأنه من السبع العجايب على الكـون
وبعض الغلا ودك من القلب ينشال
لأنه فضيحه ويجعل الناس يـدرون
بعطيك نبذه عنهـا يـوم الأجيـال
قامت تهذري بزينها وسط العيـون
بنتٍ لهـا مشـرق الحسـن تمثـال
وفي مغربه تلقى العذارى يسمـون
وفي عيونها تسعه وتسعيـن خيـال
كنهم على حوض المنايـا ينـادون
وفي كفها من صافي العشق فنجـال
لو ما شربته عود الحـال فـي دون
وان جيت للمبسم بجاوبـك بهبـال
اهل المناحل صاروا منها يغـارون
والخد لامن شفت به حبـة الخـال
تقول سبحان الذي صـور الكـون
وش جاب ربيع أول مع شهر شوال
ابسألـك دام البشـر مـا يعرفـون
تكفى يخو صيته ترى البعـد قتـال
وانا عجزت اردد ابليـس ملعـون
رح قلها إن ما رست لي على الجال
ولا ترى نادوني النـاس مجنـون