ㄨ•الـــــــــــــسهر •ㄨ


لو للسهر يا متلف الروح ذمه
والله ما أسهرني ولا أبكآ عيوني

أحيان يسري الليل يا ثقل دمه
إلى ذكرت اللي هدوني طعوني

أنثر وأشتت ماضيٍ لي وألمه
إلين أحس الدمع زاحم جفوني

وإذا نزل دمعي فهذي المطمه
لأني أنا أبكي ناس ما يذكروني

معذور يا من راح وأشغله همه
ياجعل ينسآ الهم ناسٍ نسوني

نذرٍ علي لا قلت قولٍ لأتمه
مابيع من هو شاريٍ مايخوني

واللي يحفظ الود ..هذاك سَمّه
طب الجروح وطب كل الطعوني

واللي يحاول بالخفآ نشر سِمَّه
والله لأكويهم مثل ما كووني

ياقلب عطني من بقاياك همَّه
رد الجزآ بالطيب.. مهما جفوني

يا ذا السهر.. ما لك ضميرٍ وذمه ؟؟
إلى متى وأنا الضحيه عيــوني ...!!!!



للشاع’ـر // نايف العجمي