الليل طال وسهر عيني من غبون الوقت طال
ويفرح بطول الليل جفن اللي رقد ماهو عليل
اليوم جسمي بالجنوب ونبض قلبي بالشمال
ليلي طويل الله يعين الجفن بالليل الطويل
ياجرح قلب اللي عشيره بالعرب صعب المنال
لاصار قلبه من جميع البيض مايرضى بديل
والله فلا ترقد عيون اللي فقد ذاك الغزال
اللي رماني مع براد العصر في جال المسيل
انا هقيت ان المحبه ريف روح وطيب فال
ماكنت اظن العوق للمخلوق بالرمش الكحيل
وامسيت اعاني طلقةٍ مثل التي صابت طلال
اللي رمت شيخ العرب بالغدر والخسه قتيل
ريمٍ حلاها فاق غيره بالجمال وبالكمال
رمشه رماني في سباريت الخلا عابر سبيل
واشيب عيني كان شوفه صار في حكم المحال
وشفت الركايب عقب زين الوصل نادت بالرحيل
وين انت ياراع الربابه هاتها ياابن الحلال
خله كما ذيبٍ براس الجال تسمع له عويل
واسجع بقاف اللي يسوق القاف بالدرب العدال
ورزقك من اللي لادعيته بالدجى ماهو بخيل
اشكي صواديف الزمان اللي خذت زين الدلال
واشكي من هموم القهر والغبن والحمل الثقيل
اطوي سباريت الخلا والشمس بوقوت الزوال
القيظ يكويني وانا عطشان والممشى مليل
لو شفت بيرٍ في رفاع القاع ماعندي حبال
والسدر عندي بس اخبر السدر مافيها مقيل
وما الوم وقتي كان ميزانه براع الجود مال
هذا جزاء اللي مع صحاصيح الخلا ينسى الصميل
لاشك جور الوقت ما جامل عمام ولا خوال
ولا هو غريب لا قدح بظلوعنا قدح الفتيل
ولو كان ماياطى سوى اللي داس بدروب الخمال
ماسال دم الظلم والعدوان من عكب الخليل
وان ذقت نار الغدر فالغدار له رب الجلال
وعيبٍ على اللي ساق للغدار من غدره مثيل
تابى شمايلنا هزيل الهرج لو طال الجدال
والا نجي درب الهبايل والسبب هرج الهبيل
واللي رجيت فزوعهم للنفس لاطال النزال
كلٍ بصف الخصم شال بوجهنا سيفٍ سليل
يمكن هلال العيد ماينشاف عند اول هلال
وبدر السماء بالنصف مايحتاج لظهوره دليل
كل العرب تشهد مع اللي شال حملٍ مايشال
مار الفخر بين العرب باللي يردون الجميل
اكره دروب الهون برجالٍ رست مثل الجبال
والا بوار النفس بأهل الطيب لا بار العميل
والا فأنا من فضل رب العرش راسي فوق جال
واقوى على ممشى الظمى بالقيظ لو زملي هزيل
وان كان تعديل الطبايع بالعرب ما له مجال
ماواحدٍ منا بحكم الله على الثاني وكيل


الشاعر بن غسلان