توّك تجيني بعد ماعفت هتّانك
زل الوسم مايفيد الديم وهطوله
ايه اذكر القلب يومه دق بيبانك
واليوم بيبان قلبي عنك مقفوله
مع السلامه بعد ماكان بإمكانك
تستوطن القلب كله عرضه وطوله
لمّحت لك لين شفت الخوف بأعيانك
وداريت خاطر عيون الحب وميوله
عطّرتك بكل نسمه تشغل أركانك
وشحّيت بي يابخيل الحب في توله
جيتك طموحي أعيش بظل جدرانك
وأنا جسد شايل(ن) لك داخلي دوله
الموت ماهو إذا مابت بأحضانك
الموت لاصرت بأحضاني ولاتوله
والحين لعيون قلب(ن) حبك وصانك
إرحل مع البرد وقلبي ضاع بفصوله
وإحفظ عباره عزفها الشعر من شانك
قل قالها شاعر(ن) ماشح في قوله
لو كان قلبك معايه حرّض لسانك
ما كان عشنا حكاية حب مجهوله