السلام عليكم ورحمة الله وبركاته
مساحات الفرح تصغر ولا يبقى سوى همي
..وضياع احلام وفراق(ن) ترك في داخلي بركان.
تعبت استوهم الفرحه تعبت ابكي على حلمي
..تعبت اوقف على اطلاله وادورله على عنوان.
اشوفك يالحزن وافي كأن اللي رضعك أمي.!
..او انك جيت من غربه ولقيت فداخلي اوطان.
جرى طبع البدو بدمك..فزعت بحربي وسلمي
..تسل السيف في وجه الفرح وتعزز الحرمان.
أداويك وتداويني..وتخلط دمك بدمي
..قطفت القلب وعروقه وتبدل داخلي شريان.
واذا اقبلت بجروحي تناديني " هلا عمي"
..وانا اجاوب " هلا باللي وفا اكثر من الخلان"
واشكيلك من جروحي واشكي من تعب ظلمي
..وتغرقني بأفضالك الا من جيت لك تعبان.
ومنك بس عرفت اطباع ناسي يابطل فلمي
..عرفت ان الوفا نادر وغدر(ن) هو جزا الأحسان.
عرفت الدنيا ماتسوى وانا ماكان ذا علمي
..حسبت انها عزيزة شان وأثرها مالها أي شان.
انا ماكنت غير اني صريح والصدق جرمي
..وأثر مايعيش بالفرحه سوى الكاذب مع الخوان.!
انا يكفيني لامني رحلت اترك صدى اسمي
..تزين بالوفا ولو البشر خانوا..انا الكسبان.
وانا مبطي انقتل فرحي ولا بقى سوى همي
..وضياع احلام وفراق(ن) ترك في داخلي بركان