شر الخصايل بالجمايل عقوقه

[poem=font=",6,orange,bold,normal" bkcolor="black" bkimage="" border="double,4," type=2 line=0 align=center use=ex num="0,black""]
خير الفعايل بالجمايل مجازاه=وشر الخصايل بالقبايل عقوقه
وراع الرذيله والسخافات يلقاه=والاوله بالطيب صعب لحوقه
والناس لو تصفي طوارف نواياه=وتطفي براكين الحسد من عموقه
كان السحايب تنهمل في شغاياه=وصيد الخلا بالروض تكثر فروقه
واللي سعى للربح ماخاب مسعاه=وشفت المرابح كلها وسط سوقه
بس الطلب ياطول ليله ومسراه =في وقتنا اللي كايدات شلوقه
وهذي طبوع اجدادنا ما قضبناه=طارت كما طير قطعنا سبوقه
حنا ربيع الجار لا حل طرياه =مثل الورود اليانعه في عبوقه
يلقى بنا راحة ضميره وسلواه=ياخذ كرامتنا ويضمن حقوقه
ومقبولة في كل الاحوال دعواه=ومحدن لميقاف الطلايب يسوقه
ولايشتكي نار المهونه بدنياه=ويذوق شي كبدنا ماتذوقه
وان داس زلات العرب ماشكيناه=ونسهر اليا منه جفى النوم موقه
ولا نترك المهذار بالهرج يشناه=والطبع الاول والمراجل تعوقه
ومانلمزه والا نعدد خزاياه=والا نحاول نرفع النفس فوقه
وعيوننا ماتنظر اللي بمخباه=ونفرح اليا سال المطر في فلوقه
وان غاب عن بيت المحارم حفظناه=لو تشبه الريم الخلاوي حدوقه
كنه محارم بيتنا اللي ولدناه=ونستر معايبها ونرفى فتوقه
محدن من اطراف المخاليق يدهاه=مادام شمس الكون يوضي شروقه
ولو شحت فياض الليالي رفيناه=يلقى بنا مزن تقادح بروقه
ونوفي وعايد طيبنا لا وعدناه=لو ما كست خضر الجرايد عذوقه
وان زان مرقاد الليالي سريناه=لانام خيال الرخى عند شوقه
ولا نجحد افضال العرب لا كليناه=وراع الجمايل والصخى ما نبوقه
ومن ياكل افضال الخلايق وينساه=تكثر صواديفه وتكثر شقوقه
مايجحده من خاف ربه ومولاه=غير الخسيس اللي كبار شدوقه
حنا الغنم در العشاير سقيناه=نقوة حلايب نسل عايش ونوقه
وخوينا في لاهب القيظ شلناه=في سهلة بالقيظ تكوي حروقه
والذيب لاذ بشيخ ربعه وعشاه=هرش شكى جور الليالي وضوقه
واللي مع السجده وليه توفاه=وهو يرتجي رب الخلايق عتوقه
واللي سمع ريم الغنادير تنخاه=ومن صيحة الخفرات ماتت عروقه
قوم مراجلها تقرب مناياه=واللي يجيب الطيب جبنا طبوقه
وكم حايل لاجل الكرامه ذبحناه=ما سد عن ذبح النجايب غبوقه
وكم غالي رغم الشدايد عطيناه=للي شكى ضيم الدهر مع رهوقه
وصمنا شهر رب الخلايق وقمناه=وصوت المدافع كالقنابل شعوقه
وكتب الشريعه تنتشر في زواياه=وتفسير ولد القرطبي في وثوقه
لو ماذبحنا ساجد في مصلاه=او حرمة بالبيت تشكي طلوقه
فعل على وضح النقى ماسرقناه=والناس تشهد في مكارم خلوقه
ماهي دواوين بزحله طبعناه=للي يطهبل لاجل يطبع خثوقه
يبي الفخر للي على جال مركاه=وفي ساعة الشده سريع نسوقه
هذي طبوع اجدادنا اللي عرفناه=وهذا هوى راع المكارم وذوقه
طيب لنا من دور حاتم ورثناه=والطفل يجري في مجاري عروقه
وكل القبايل له مكارم وفزعاه=ومواقفه مثل الجبل في شهوقه
وان حل طاري طيبهم ماجحدناه=وثوب النقى محدن يقطع بنوقه
لكننا حزنا القلايد وذرواه=والنفس ماتدري بساعة نفوقه
[/poem]

الموضوع الأصلي: شر الخصايل بالجمايل عقوقه || الكاتب: فواز الغسلان || المصدر: منتديات بعد حيي

www.b3b7.com

كلمات البحث

مواضيع اسلامية، مواضيع عامة، قصائد، هاكات ، استايلات