صديق الطفولة لطلال الرشيد والرد عليها..

بعد وفاة الشاعر طلال الرشيدرحمه الله وضعت مجلة فواصل
قصيدة صديق الطفولة

وكان للمساعد نصيب الأسد في مجاراتها :
قصيدة طلال الرشيد رحمه الله :


(رسالة..إلى صديق الطفولة)

صديق الطفوله وش جرى لك مع الأيام
هي أنصفت دنياك والا أنت بك مثلي

فقدنا ملامحنا مثل ساير الأنام
عبث بنا جور الزمن والزمن يبلي

وقفنا جميع وبيننا حاجز الأعوام
صعيب وصولي لك وياصعب لك وصلي

وأنا أشوف في وجهك طريق غشاه عتام
وذاك النخل واشوف دارك ودار أهلي

وسدره هي أكرم من أهل بيتها اللوام
وفي وجهك أصحابي عصى مدرسي وفصلي

وعود كبير ودايم فالظلال ينام
في ذكرياتي له بعد ملمح وجلي

وسور كتبنا فيه ذكرى عبث وأوهام
ولي في عيونك صورة زانها جهلي

بثوب تبلل بالمطر والتراب وشام
وأنا حب أسير العب وهي حافيه رجلي

أنا وأنت طفل وطفل دايم رضى وخصام
بكانا سهل والضحكه أمر بعد سهلي

دعاني بوجهك ناده ينده الأحلام
معه رمح مدري هو علي غاضب أو لجلي

أنا كيف أباصل والأمل خلف مو قدام
كثير الأسى والسهد يا من فعل فعلي

وهذه مجاراة الشاعر فهد المساعد:

فقيـد الرجولـه ويـن حطـت بـك الأقـدام؟
انـا مـا تخيلتـك تــزور اللـحـد قبـلـي

عقيـد الطنايـا شيـخ شمّـر ذرى المنـضـام
حفيـد الجنـازه بلـوة اللـي بــلا المبـلـي

عقيـدٍ لقومـك.. بـس تبكـي عليـك أقــوام
من الساحـل الشرقـي الـى الساحـل القبلـي

أنا لا ذكرتـك طـاح راسـي علـى الأكمـام
اسولف لقلبـي عنـك.. وأبكـي علـى مهلـي

أسولـف عـن أول مـرةٍٍ جيـت قبـل العـام
و شفتك بعينـي مثـل مـا كنـت فـي عقلـي

اميـر و عظيـم و شاعـر و فـارس و مقـدام
سجّلّ البيـاض اللـي بنقـش الذهـب مطلـي

سنافـي شهـم فـزاع .. لا قـام يعنـي قــام
يغيـث الضعـوف ولا يقـول الوبـل وبـلـي

طـلال .. الشهامـه نكّسـت عقبـك الأعـلام
الا من قتل خيّـال .. وش نفعـة ( الرجلـي؟ )

طـلال .. الأوادم كلهـا مـن لحـم و عظـام
تعيش و تموت بصمـت .. تالـي ورى متلـي

عداك انت يا من عشت عمـرك عظيـم اشمـام
وقفت فـمماتك تنتخـي: (مـن نـوى قتلـي؟)

رحيلـك بنـى للحـزن وسـط القلـوب خيـام
و وداعك جعـل كـف الثـرى بالدمـع مملـي

عسى من لبست لخشيتـه فـرمضـان إحـرام
و دعيته يا رب اكرم نهار الحشـر نزلـي

يعوّضـك عـن دنيـاً بهـا حاسـد و نـمّـام
و يرفـع مقامـك عـن مقـام البـرى السفلـي


الله يرحمه ويسكنه جنات النعيم

منقول

الموضوع الأصلي: صديق الطفولة لطلال الرشيد والرد عليها.. || الكاتب: جـــود || المصدر: منتديات بعد حيي

www.b3b7.com

كلمات البحث

مواضيع اسلامية، مواضيع عامة، قصائد، هاكات ، استايلات