يالله اني طلبتك يامنجي خليله

[poem=font="simplified arabic,6,black,bold,italic" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]

يالله اني طلبتك يامنجي خليله=كافل الخلق كله بالعطى والنوالي
ترحم اللي دروبه بالفيافي طويله=الطواريق تفجع والركايب هزالي
مع طلوع الثريا فوق خشم الرعيله= واللواهيب تسطي في جنوب الجمالي
واتجه للفيافي قبل ياخذ صميله=خالف اهل النصايح بالسنين الخوالي
ويوم صارت رماله مثل رمل المليله=والتويبع جحيمه قبل وقت الزوالي
مالقى له ظلال يستره في مقيله=وسدرة الشوك مابه للنشامى ظلالي
ماوطتها الخلايق في قليب وثميله=ولو يشوف الثمايل مالقى له حبالي
صار يرقى النوايف ثم يومي شليله=مع سراب تشوحه نايفات الجبالي
وحايفات الافاعي ترهبك في صليله=تضرب اللي يشوفه بالهلع والجفالي
والظمى بالحنايا مثل جمر الفتيله=حالة اللي قراره بالحياة ارتجالي
قارن اهل الفراغه مع بناخي سبيله=تاج شمر وعزه في جنوب وشمالي
مادرى ان العواصي طالت المجد خيله=درع شمر وسوره عن صدوف الليالي
وطيب نسل المحمد نافل كل جيله=والفراوي حسمها عن شكوك وجدالي
وشاف مزن البواشا يروي القاع سيله=لين تجري سيوله في جميع المفالي
ولا لقى بالجماعه من يبرد غليله=ولا صفى بالرفاقه غير خمسة رجالي
اكثر القوم غادر قبل يعلن رحيله=وحط نهج الرفاقه بالعرب فيدرالي
ان تجمل بربعه ماتراعي جميله=وان تردى غدى له بالعرب كرنفالي
سجلوا لي عيوب جمسنا مايشيله=وسار فيها المحلل تقل سواق رالي
وغيرة اللي تمشط بالروايح جديله=تبعد اهل الخباثه عن دروب العدالي
ولاتهد العزايم لو تقدم موديله=او عزيز فعوله مثل فعل القبالي
صنت روحي وهرجي عن دروب الرذيله=والعلوم الرديه لاجل عيشة عيالي
يوم قلت الكرامه والندى راح جيله=والوفى والمبادي ماتساوي ريالي
والشهاده ترسخ جهلنا ماتزيله=دام فكرك يخابط في زمان الهلالي
ومن يسوق العذارى عرس يوم وليله=سابح بالدياثه والخزى والهبالي
لو فعلها عزيز له مقام وقبيله=والخزى مايفرق بين طامن وعالي
والتواريخ هذي به علوم دخيله=اكثره ساق زمله في دروب الضلالي
يظلم اهل المبادي والنفوس النبيله=ويرفع اهل الظلاله للدروج العوالي
وكفر الاجداد قول مالقينا دليله=والظليمه جزاها عند رب الجلالي
وقلت ضاعت ثقتنا بالشيوخ الجليله=وصار راع الفضيله مثل راع المعالي
وان باب الشريعه للمكاسب وسيله=تجعل الشيخ الامجد بالعرب راسمالي
وان ركض المشايخ للمطامع فشيله=يدخل امر الفتاوي في دروب الخيالي
ومن يخالف كلامي قبل قوله وقيله=في صفوف المشايخ او صفوف الملالي
كل رجل يقدم للنشامى كفيله=لاجل يدخل وندخل في حوار وسجالي
لاجل نظهر ويظهر للخلايق زبيله=يانلاقي بديله او يلاقي بدالي
[/poem]