خليج النفط صاغ الحلف مع سربة بني يعقوب

[poem=font="simplified arabic,6,black,bold,italic" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]



خليج النفط صاغ الحلف مع سربة بني يعقوب=وجاه الخوف والتهديد من سربة بني ساسان
تغازل قادة الليكود مثل النمس والسنجوب=لعله تقنع اللوبي لباب الصفح والرضوان
وقالت لاجلكم خضنا على الشرع القويم حروب=وحطمنا العراق اللي جيوشه واقفه لايران
وشلنا قيمة الدولار يوم انه وقع معطوب=وعاد لقوته يقصف جموع الشرع والايمان
وجاكم نفطنا والمال وسط بنوككم مكبوب=لاجل يدعم سيولتها قبال الصين واليابان
وعدلنا مناهجنا وصار ابريقها مربوب=وجعلنا الكتب ماتطري ضياع القدس والجولان
وخذلنا سربة العربان مع كوكس وجيش قلوب=وجبنا شبلنا السيسي بديل لقادة الاخوان
ودعمنا القصف في غزه بنقوة مالنا المكسوب=لاجل ننهي حماس اللي تثور وترفع القران
وشجعنا خروج البنت للشارع بلا مندوب=لاجل تكشخ بلبس الجنز عقب الشال والفستان
ودعمنا سادة التغريب في ديوان ابن صقعوب=تمجد في طبوع الغرب عند الورع والنسوان
وصار اعلامنا الرسمي لفكر رموزها مجذوب=ومعها زمرة ام بي سي مثل الحبر والرهبان
برامجها وطاقمها غدو لافكارنا ميكروب=وهي مركز دعاة الفسق والتغريب والعصيان
تخلي منهج اهل العيب والعفه ماهو مرغوب=وتنثر في برامجها سموم الداب والثعبان
وشفنا فكرها يرسخ بنا في كل حدب وصوب=ونتايج جهدها المذموم مايخفى على العميان
وكل شعوبنا شافت حقيقة ذودنا المجروب=وصار البوق مايحتاج له شاهد ولا برهان
ولاترموننا نبلش بعملة قرشنا المضروب=وعقب امجادنا نصبح بميدان العدى رعيان
وسطوة جيشنا الكاسح ونار سلاحه المرهوب=هياط لابغيت الصدق مايضرب لك النيشان
وتصميمه لاجل يحمي مصالح طفلنا الدبدوب=وعند النقد والثوره يفجر عشة البدوان
وجيش الفرس وعتاده علينا يشبه الصالوب=وله قدره على التهديف قاله خالد الحربان
واقول اليوم دام الساس بقصور العرب مشطوب=تبي تسقط ولو تدبل حديد السقف والعمدان
ولا تحمي بيوت الظلم من ريح الزمان خبوب=وكل جهودهم لاقت صدود القوم والنكران
وكل حروبهم صارت بوسط حلوقهم كلوب=وربي ساق حاميها وكثرة حولها الديبان
وجاه اللي جعل حظه بميدان البشر منكوب=قبل يشعل ظلام الليل نور القصف من طهران
لان عيونهم كانت تشوف الوضع بالمقلوب=وظنت حلفها البالي يباريها دهر وازمان
وربك بدل اطماعه وفره فرة السكروب=وكل احلافها الماضين صارو بالقسى عدوان
وشفنا كنز دنياهم ببلدان الطرب منهوب=يعيش جياع واشنطن وبطن الرمل واليتمان
ولكن اجرها يبقى نصيب التاجر الموهوب=على الدعم الجزيل اللي حضى به جايع البلقان
ونهب اموالهم صارت بداية فتحة الدالوب=وباب العمس مفتوح لقوم ماتريد احسان
مشوا بإرهاب واشنطن مع ان ارهابها ملعوب=وهو عذر الذي ينوي يحارب سربة الرحمان
وعنوانه غدى ثوب بطياته ثمان جيوب=لاجل يشمل بمضمونه جميع الدور والليوان
وجاز لقادة العربان دامه يفعل المطلوب=ويدخل في دهاليزه خصوم البيه والسلطان
واقول القمع والترهيب بسجون العرب مصبوب=تنفذها عصابات النظام البايد الهلكان
وضحك الجند بالخالق قبال المسلم المصلوب=وفعل الفاحشه باللي بقيد المافيا بلشان
تركها دون شرعيه ولا بيعه ولا ماجوب=وحكمه نفس حكم اللي على فرعون ياهامان
يبونك ترتجي فضله وتطلب رحمة المنصوب=ومهما كان ماتشكي من اللي ينظرك حيوان
لان النقد والشكوى وحق المسلم المسلوب=يصير ارهاب ممنوع براي البحث والديوان
وبغض الدين ورجاله جعلهم بالفجور قروب=وجاها اللي ضحى الخندق لعب بأحزاب ابوسفيان
وكان القتل والتكفير باسواق الجهل مجلوب=فهو زرع نثر بذره جدود شيوخنا الشجعان
قتل ثلث البشر في نجد مع عنتر ومع شيبوب=ومات الثلث من جوعه بقطع الغرس والبستان
واظن النفط وامواله غدت لديارنا عذروب=مدام شعوبنا جازت نبوع الخير بالطغيان
لفتنا ثروة تجعل لنا بين العباد خطوب=لو ان عقولنا حطت غيار الوقت بالحسبان
نشوف الناس تتقدم بعلم الرصد والحاسوب=وتبني قوة ترهب نجوم الحرب والتيجان
عقول حطت اوطانه على قمة بشر وشعوب=وصار الشعب له قيمه وتكريم وحقوق انسان
لان الطير مايكفخ وساقه بالسبق مقضوب=وراع الفكر مايبدع بدار الهون والحقران
وحنا مالنا بالطبخ لافرسن ولا عرقوب=بنفس مراحنا اللي زان مرقاده قبل كنزان
قضينا الوقت سهرات بحضن الجادل الغرشوب=وراح المال لبنوك نهبها الفرس والرومان
جعلنا شغلنا الشاغل جميل اللبس والمركوب=وكثر البذخ بأموال نثرها الفاسق السكران
وكل همومنا تمريرة الدوخي من الشلهوب=وعقب الصيف وحروره نطارد جافل القعدان
وحفلات العرب تسجع بمدح القايد المحبوب=وفي عز البلد دامه بقبضة فارس الفرسان
ثمان عقود ماجبنا مثل نيدو ولا سنتوب=ولا تصميم ماطور لجذب الماء من القلبان
مدام اللي ظهر فكره غدى في ليلته مسحوب=تجيه الجند تحت الليل بالمخلب وبالنيبان
لانه عندهم عاقل ولا له بالحياة طبوب=سوى سجنه وتعذيبه بدار البوم والغربان
ولا ادري كيف نتقدم وهذا فكرنا المنجوب=مدام المجد مايبنيه قوم فكرهم خربان
فلا سرنا على المله وكتب الشيخ ابن مخضوب=ولا شدنا الجسور اللي بناها الروس والطليان
صداع الراس يتكرر لراس بالدجى معصوب=ومجروح الحشى يخفي طعون الغيظ بالكتمان
لان اهل الحسد جمره بمعلوق الحشى مشبوب=وتذكر في مجالسها هروج ساسها ماكان
واذا ماثار حسادك ومعها البوق والشاذوب=ترى مالك بدار المجد لا نمره ولا عنوان
لان الحسد ماتظهر لواهيبه على الدغلوب=ولا تبلى الرزيل اللي بشدات العرب مابان
ولاتلقى بكل الخلق نفس ماغشاه ذنوب=او اللي ما رمع رمعه وصار برمعته غلطان
ولاتفرح بعيب الخلق وثيابك تفوح عيوب=ولاتجزع اليا ناديت قوم مابها مزبان
واذا فكرت في دنياك عفت الزاد والمشروب=وعفت الزود بديار توالي زودها نقصان
ديارٍ تدخله تبكي وتطلع خايفٍ مرعوب=تذوق الموت وعيونك تراعي قاصر الوغدان
جمعت اموالها طايع وتترك كنزها مغصوب=وجيت سهالها عاري وتطلع مثلها عريان
لفاك المال من قوم جرى له بالحياة غيوب=وحزت الدار من قوم طواه الموت والنسيان
مع انه مثلنا تلبس زبون الباديه والثوب=وفيها الفقر والنعمه وفيها البوم والعقبان
ومع طاروقهم ترحل لمنزال اللحد والطوب=وتترك خزنتك للي لفاه الخير بالمجان
واذا قلت الشرف والدين والغيره عطوك كعوب=وجاك ارهابهم يقطع سهال القاع والوديان
ومن حارب ولي العرش يسقط خايب مغلوب=ولا يحمي ركون العرش لا بيجن ولا ريجان
على درب القدر نمشي ولاندري عن المكتوب=ولو ندري بعلم الغيب ماطحنا بدون اعوان
وكان اسبوت مايبلش بفـتح الموقع المحجوب=اشوفه ماقدر يفتح قفول الفكر بالعربان
[/poem]