نقدر نعيش بلا جواز ولا سجل ولا قيود

[poem=font="simplified arabic,6,black,bold,italic" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]

الحمد لله يافهد تبرق على شامة زرود=وسط المزون اللي تقادح بالظلام زنادها
وبل السحايب لاهطل فوق البعايث والنفود=يودع غنادير الجبل تنزع ثياب حدادها
والرزق مايآتـي عـلـى كثر الكـتـايب والحشود=ربي كـتـب رزق الـبـشـر باللـوح قبل ايجادها
ان زان وقتي ماجزيت اهل المكارم بالجحود=وان شح رزقي مامنعت النفس عن ميرادها
والخوف من سهـم الـمـنايا ماحمى عمر الشرود=ولا ضاع عـمر الـلـي تـقدم بـالـجـمـوع وقادها
ومن شح بأوقات الصبى لاشاب لايمكن يجـود=وفرخ النداوي لا طـرد جول الحباري صادها
والطيب كان انه ظهر صيته على وقت الجدود=ماشاع بأجداد العرب يظهر بطبع احفادها
ولا تنتظر طيب الفتى عقب التردد والوعود=والهون لنفوس العرب لا كثرت تردادها
ومافات من عمر الفتى لو صاح لايمكن يعود=وحوض المنايا يجدع الخدام جنب اسيادها
ولو كان مالي بالخلايق لا عذول ولا حسود=قلت ان خيلي ماطوت خيل العرب وجيادها
نار الحسد تدفع على الغيبه وتقطيع الجلود=ومن حاز ناموس العرب لازم يذوق احقادها
والغيث مايآتي قبل تـرجـف مرازيم الرعود=ومحدن خذى لذة حياته لين ذاق انكادها
وماني من اللي يجزعه نقص الدراهم والنقود=لاصرت سالم من مطاليب العرب واقصادها
بالمال سترٍ للفتى لاسار به ضمن الحدود=والا سبب ظلم النفوس وذلها وافسادها
والفقر يرمي صاحبه في منة الهيس الربود=ويودع هوامير العرب تهفي مقام اجوادها
والطيب هو ساس المكارم والمغانم والخلود=والبخل يرمي سمعة اهل البخل مع جلادها
كم زارع يبي الحصايد طاح ببطون اللحود=وكم وارثٍ ينزل قصورٍ بالملا ماشادها
رغم ان هرجات الردى شوك الضماير والكبود=والزمل لاطال المدى تجزع بلسع قرادها
ولو شفت حالي من ثلاث سنين تنقص ماتزود=والطيب الاول في عصور العولمه مافادها
تقسى ليالي عمرنا وعزومنا ترقى سنود=واهل الفخر لولا الـعزايـم ماتحوز امجادها
وكل الشدايد مع كبار العـزم تسهل ماتكود=ولولا العزايم مايفيـد النـاس كـثـر اعـدادها
وجسمي ضعيف بالقسى ماني مثل عاد وثمود=اللي على صم الصخـر كانت تطـق اوتادها
لاشك عزمي عزم فايز يوم يسري بالعمود=ويخمد شرورٍ غير فايز مايطيق اخمادها
ولاعيب في رجلٍ وقـع بحـبـال هافين الـعهود=العيب عيب اللي تبوق الناس في ميعادها
هذي تجارب عاقل خاوى الثعالب والفهود=ويفهم وقايع عنتر العربان مع شدادها
اجمع تواريخ الجزيره بالوثايق عـود عود=وانشر فعول اهل المراجل والـندى بإسنـادها
من دون كذب ولا ظليمه بالروايه والردود=ماني بصف الباديه ولاني بصف اضدادها
وماني خفيف بالعقيده يجذبه رخو الزنود=ولااطير برياح الهقاوي لا شلع منطادها
واكره نفاق اللي جعل بعض الليال البيض سود=واللي تخلي رتبة الطلاب فوق استادها
واغلي طواريق المراجل والسكينه والركود=ونار المكيده ينقلب شره على اللي كادها
وماني من انصار الجرايم والبنادق والفرود=وتصدير رايات الفتن والقتل واستيرادها
ومااقوم للهيس الذي يهدي جميلات الخدود=للي يقرر قوة الفحمات واستعدادها
العرس ساعه والكرم من شيخنا الهرش الهدود=اللي تكرم بأفتتاح البنت في ملبادها
وتاخذ طلاقه مع شهادة فتح لعيون العنود=وهذي دياثه واحتقار الناس واستعبادها
لين اصبحت بعض القبايل مابها بكر ولود=والجايزه ختم رزيل بعد فك قيادها
وصمت الامام الحنبلي بين التردد والبرود=خلا بنات الزمبلي تشكي عصى جلادها
وش يفرقه عن مذهب الشيعه وحانات اليهود=والا الضروره تجدع الوفره ورى بغدادها
لشيوخنا اللي عادت الاسلام من غيران هود=وشالت جميع اموال نجد وخيلها واذوادها
صارت تباهى بالقصور وبالحدايق والورود=والا لتسليح الجيوش وعدته وعتادها
والجوع يفتك بالبشر بين الصحاري والحيود=والناس تحرق زرعها المامول باسم جهادها
وحفظي لتاريخ الجبل يوم الجميماء والكيود=والصدق بعلوم الندى والجود عند ايرادها
ماتعني ان الراويه في خانة الخصم اللدود=او ذيل لعيال النضير اللي شمخ موسادها
قالوا خطير وسيرته مثل اللهايب في سكود=او يرسل الجمره بهاتف حارته وايبادها
ولولا الفشل ما زرفلت مع حاجة ماله وجود=الا بشاشات الطقوم الفاشله وارصادها
وحجز الهويه والسفر والنوم مع عبد الودود=تدخل رزين المرجله في سكة مارادها
عامين واثباتي على ثكنات عسكرنا يرود=وغابت علومه بين ضباط الردى وافرادها
قلت امنحوني مثل اقامات البلوشي والهنود=حتى رجاجيل البلد ترتاح وسط بلادها
قلت ان جد جدودنا بأرض الجبل قبل الجرود=يوم اليزيدي يعلن حروب البحر وطرادها
وخل الهويه والكرامه للبخاري والزيود=دام العرب بأرض العرب ترجي زكاة اكرادها
وحنا نعيش بلا جواز ولا سجل ولا قيود =وماراح نجلس في لهيب القيظ لاستردادها
نطلب معيشتنا الهنيه بالركوع وبالسجود=من واحد يحصي طواليع الخلا واعدادها
وارزاقنا مايمنعه راع الحواجز والسدود=ولا يمنعه خبث النفوس الواطيه وعنادها
هذا الطحين وعندنا التنور الاول والوقود=ونرتاح من طبلون كهربها ومن عدادها
ورزقي ورزق اهل المراجل عند حلال العقود=والحمره تـقـدر على رزقــه ورزق اولادها
دامي رحلت عن الثمايل للسحايب والعدود=ونزلت في هداج تركيها على عوادها
له جمة وقت الظمى مايشحنه تسعين ذود=وفياض شيخ لادخل بين الخلايق سادها
شوق الهنوف اللي تباهي بالردايف وبالنهود =اللي عطور المسك والريحان ريح اجسادها
ترجي عزيز هدته تقوى على كسر الجمود=وكفه تقيس اطوال وقفات الندى وأبعادها
غاذيه تركي في منابع جده الشامخ سعود=اللي حلف ماترقد سيوف الندى بأغمادها
عبدالعزيز اللي لبس ثوب المكارم والصمود=والناس تذكر سربة الفيصل ودرب جهادها
والخال ابن عواد مدباس العساكر والجنود=شيخ شهيرن بالدواسر من عصور اجدادها
من لابة كفه تبيد الكبش الاقرن والقعود=خطلان الايدي والدلال اللي يـفـوح قـنــادها
بنزولهم حس النجور اللي تنادي للوفود=ما تطلب الضيـفان لابواب الـبـيـوت ارشادها
انشد عن الريشه وعن خمس المواقف والبنود=وتلقى دليل اهل المراجل في سجل اعيادها
ولاخير في قول يجي ماله براهين وشهود=وزود الكلام ان مانقص دور العرب مازادها
ومادام ابوتركي شمخ بين الصوارم والاسود=عقبه حلفت ان الركايب ماتشد شدادها
يكرم عن اللي دون ماله بالفراغه مايسود=ومحدن مدح طيبه وجوده من سنة ميـلادها
والله فلا ارفع بالخلايق واحد مافيه فود=كود الذي شال الفزوع وصار من روادها
وكان الخلايق في مواعيد الندى عينه تنود=ماراح نزعج لابة تسبح بموج رقادها
[/poem]