يا صغيّر مايكبرني لقب

ياصغير مايكبرني لقب
ومايصغرني إلى أنكرني صغير

ماخذينا الصيت من جمع الذهب
ولا نسابة شيخ أو قربة وزير

كاسبينه من هل السيف الحدب
الجنايز كان ما جاك النذير

صيتهم نجم على راسه لهب
سمعوا الصقهان به وجه الضرير

بالوفا تاريخٍ أبيض ينتصب
لا حكوا بالحق حيين الضمير

ضيغميٍ للسناعيس انتسب
لابةٍ طلنابها عرشٍ كبير

عند حدك ياكثير الهرج تب
ولا تمر النار وثيابك حرير

كان لك عز بذلي ف اتعقب
والله إلا تبطي وحبلك قصير

أحسب أنك من صناديد العرب
وأثر ساترتك عباتك ياغرير

ما حسب للسوس زراع القصب
والقراده مادرى عنها البعير

ولو حسبنا للحسايف والتعب
مابذرنا يالعصافير الشعير

عن هلك ابراي لله وأحتسب
الرجال اللي مجاراهم عسير

من قريش المصطفى وأبو لهب
والدغالب ماغشت عذب الغدير

للرجال من الرجاجيل العتب
والزكاة تحل في حال الفقير

لعنبو وقت غدينابه حطب
تحرقه نارٍ يثورها أجير

ما ألومك .. الزمن سوى العجب
هو بقى غير الكرامه بالجفير؟!

ما أذل وراسي يشم المهب
لو بقى من شمرٍ طفلٍ غرير

وما أهاب ولا يزلزلني غضب
الشجاعة ورث والعاقل غزير

ياصغير مايكبر باللقب
غير منهو كان من دونه صغير

الأمير
طلال الرشيد.. رحمة الله