قصيدة .... الغفران

اخواني واخواتي

السلام عليكم ورحمة الله وبركاته

سعدت بتواصلكم ...... سعدت بحضوركم

انتم مِداد الكلمات .. وانتم ينبوع الابداع المتدفّق

بكم نتألق .. ومعكم بزيد البريق

لكم مني اجمل التحية واعطرها

لكم مني كل الاحترام والتقدير


وبمناسبة الترشيخ الجديد والاشراف اهديكم هذه القصيدة بعنوان (( الغفران ))


ألا يالله يا خالق جميع الناس يا رحمن
إلهٍ تعلم أسرار العباد وتحصي أقواله
تسبّحك الأراضي والطباق السبع يا حنّان
كما إنك قادرٍ تعطي لعبدك كل ما ساله
تجيب لمن دعاء بأسمك الأعظم يطلب الغفران
نظرك بعين من يرجي ثوابك بأخر أعماله
وأنا شاعر .. ولكني أحط الشعر بالميزان
أجيب المستفاد اللي أشوف الناس تهواله
عن الزلّة عن الميله عن الغِِيبات والبهتان
أجنّب عظمة لساني .. وفال الله ولا فاله
ألا يالله يا ربّي نبي عفوك من النيران
بني آدم بلا عفوك .. ضعيف بجهده لحاله
خذتنا لذّة الدنيا بها نركض بلا حسبان
ووقفنا اليوم نتذكّر ليوم الحشر وأهواله
عِبَر والمعتِبر تنفع له الذكرى عن النسيان
بيومٍ تشخص أبصار العباد .. وحالته حاله
جميع الناس له آجال عَلَمها الواحد الدّيّان
بيومٍ ينفخ إسرافيل نفخة تأخذ آجاله
وإذا الأرض مدّت .. والجبال القاسية كثبان
تصير تراب من هولٍ عظيم حلّ زلزاله
فناء شامل .. ويبقى المنفرد بالشأن
تعالت قدرته ماله شريك ولا به أمثاله
يوم الهول يوم العرض يوم إن السماء دخان
وكلٍ قام من قبره .. يتحرّا العرض لأعماله
فمَن يعمل من الحُسنى ينال الكتب بالأيمان
ومَن يعمل من السيّء .. جزاء السوء يجزاله
وحنا يا بشر فوق البسيطة داءنا النسيان
فمَن لك يا ضعيف توجّه الدعوة وتنصاله
وأنا لا ضاقت بوجهي .. رفعت الكفّ للمنّان
يمنّ بفضله وجوده على عبده بأفضاله
وأنا لامن بغيت اشكي .. شكيت لمنزل الفرقان
عليه ولا على غيره .. هو اللي دوم يشكاله
وأنا لامن همّي زاد .. وحلّت فيني الأحزان
توجهت لطلب ربٍ جميع الناس تلجاله
تطهرت ونويت أسجد لمولانا له الإحسان
كريمٍ ما خسر عبدٍ رفع كفّ وتعناله
تعالى خالق الدنيا .. تعالى مصوّر الإنسان
تعالى غافر الزلّة .. تعالى من سجدناله
ألا يا قابل التوبة طلبنا عندك الغفران
أنا بنادم وأكيد أخطي ولا أحدٍ ضامن أفعاله
رفعنا كفوفنا نطلب من المولى عزيز الشأن
ألا يالله تنجينا عذاب النار وأهواله