قصيدة يادلع
يادلع يانور يابهجه وياكل الصفات
ياحلو يازين ياممتاز ياكل الأمور
فيك ربي خصني يازين من بد البنات
وفيك شفت الكبرياء والفلسفه واحلى شعور
باني(ن)في القلب ياغالي صروح عاليات
زارع في القلب حبك لين ثبت الجذور
نابت في القلب ودك آه يابرك النبات
عالي في القلب شخصك معتلي فوق الصدور
وان رجعت لوصفك الا كامل المميزات
من جمالك تنثني لك كل غالية العطور
كن عينك عين حر شايف صيدته جات
كن دمه وسط صدره يحترق ولا يفور
ومبسم سبحان ربي كن به سكر نبات
عنده انفاسك تنافس يالله تعيّن عبور
لين عود وفارع بالطول ومميز صفات
كن ربي صف جسمك بالتسلسل دور دور
منحرك يابري حالي ماتغطيه العباة
اي وربي يختلف ماشفت مثله في النحور
كن خصرك مايذوق القوت في طول الحياة
لانظرته قلت هذا جاه من وقته دبور
وكن ردفك منعزل عن عودك يدوّر نجاة
ايه كنك رسمة الرسام في وسط السطور
جعل ربي يحفظك من شر ناس(ن)حاسدات
والله يخليك لامك حي مع طول العصور
لايغرك وقتك اللي حطك بعز وثبات
شاور اللي بعد شوره ماتقرر باي شور
لاتتوه بها الزمن وتضيع وسط المغريات
صدّق اللي لو وفالك طول عمره مايبور