يالله تجعلنا مع الصحب الاخيار=في قدرتك يامعطين من يسآله
رحمتك يامعبود ياوال الاقدار=ياباسطن ارضه ومرسي جباله
انت الكريم المعطي النافع الضار=يارب عفوك ياعظيم الجلاله
ومن بعد ذكر الرب رتبت الاشعار=وبدعت من زين المعاني جزاله
وجهزت قيفانه على كيف ماختار=من هاجسٍ درب المعالي رقاله
غض النظر عن عورة الجار ياجار=احفظ جوار الجار وادمح خماله
الجار غلطاته ولو انه كثار=استر عليه وعامله بالجماله
عليك بالعليا ولو صار ماصار=احذر مجال الطيب ترخي حباله
ارق السنود وجنب اوكار الاشرار=الخايبين الناقصين الحثاله
ابعد مجالك بدل الدار بديار=وارتك على اللي كاملاتٍ خصاله
الصاحب اللي عادته شبت النار=النادر اللي ماتدور بداله
اللي ليا جاله من الناس خطار=يفرح بجيت من تعنا وجاله
مدهال لاهل الصيت وافين الاشبار=الطيبين الغانمين الشكاله
ودلال بغداد بهن بن وبهار=يغدن عماس الراس في كل حاله
هذا هواي ورغبتي ياهل الكار=في خوة الوافين عز وبساله
ومشين مع البيدا على وقت الاخضار=يطرب لها قلب الهواوي وباله
في خايعن ماديجبه عقب الامطار=انا أشهد انه طب قلبي وفاله
والعمر يعلم فيه قصاف الاعمار=والرابح اللي مامشى بالضلاله
وأختامها صلو علي خير الابشار=اعداد ماهب الهوى من شماله
وقرّ العين بالطيب والشموخ والمعنى الوافي
يــاا الـــــوااااااافي
صح الله لساانك ملايين وسنين
لاهنت والله يالغالي
تشرفت بالمرور من هنا
وجديدك منتظر شاعرنا القدير
اطيب المنى لروحك
حمدان سليمان
صح بدنك يالعزيز وانا لي الشرف بمرورك وقراءتك حروفي المتواضعه كل الشكر لك ولكل حرف كتبته اعتبره وسام فخر واعتزاز الله لايهينك تسلم الله يعافيك ولاخلا ولاعدم من اطراءك الكريم المشرف يالسنافي
صح بدنك ولاهنت يابعدي والف شكر على كل حرف كتبته اناملك تسلم ولاخلا ولاعدم من تواجدك المشرف واطراءك الفاخر يالغالي وطلبك فخر واعتزاز لي ولكن القصيده خاصه بالربع وماهو جيد نشرها في غير موقع المعنيين بالقصيده وان بغيتها ابحث بقوقل بأسم (نهير النمش) وتجد اغلب قصائدي وان شاء الله تجد مايسرك ولي الفخر بك وبطلبك وان حبيت ارسلها لك على الخاص لامانع