الناس تال الوقت ضاقت صدوره
على اقرب الاصحاب بيّن غضبها
الظاهر ان الناس قرّب دبوره
اشوف شيطان الاوادم ركبها
ناسن تقلّد حقدها في نحوره
وابليس في سوق التهالك جلبها
مات الرحم والبغض بيّن نشوره
وكلٍ على الصدقان خيله هذبها
دور الرحم قفّاء ويبست زهوره
واستسلمت بعض الرجال لجربها
شيطان الانفس حط للناس بوره
نيران حقدن والاوادم حطبها
ثبّت مراسيمه وعمّر جسوره
بين الرفاقه لين فرّق شعبها
القطع سوى له على الناس ثوره
كم لحيتن سيف القطاعه قصبها
كلٍ على الهسات يبرز حضوره
واسرج خيوله للهزال وهذبها
علامت الساعه تبيْن ظهوره
من يوم نار الحسد ولّع لهبها
مشعل عسام الغافل التريباني الشمري في 18/10/1442هجري