السلام عليكم ورحمة الله وبركاته
في عام 1963في عهد المرحوم الملك فيصل في فترة حرب اليمن كان هناك جماعة من الوداعين وعددهم خمسة ومعهم واحد من الشكرة وواحد من الصخابرة وكانو عائدين من اليمن بسياراتهم النقل المحملة بالبضائع من القهوة والارزاق وكان يرافقهم واحد من قبيلة شمر بسيارتهم فتعطلت عليهم فاخذ الشمري يجمع الحطب علشان يحرق سيارته فاستعجلوه اخوياه لان سلاح الحدود كان وراهم يطردهم فنخا الشمري بعزوة ياعيال زايد ففزوا له ووجدوا الحل في تفكيك سيارته قطعة قطعة وتحميلها وقامو بتحميلها في سياراتهم الاربع ولما وصلو الى نجران كان الخبر عند اميرها خالد بن احمد السديري يرحمه الله الامير السابق لنجران وسر بفعلتهم واكرم كل واحد منهم ومعهم الشمري فتكفل بتصليح السيارة على نفقته الخاصة وهذا فعل الرجال الطيبين مع اخوياهم لان الخوه تلزم عند المطاليق شرواكم. وبعد ذلك انشد خالد الشمري هذه القصيدة بعد ان وصل الى اهله ...
ياحمود هات الفرت واكمـل زهابـه
كمـل زتاتـه يازبـون المشافيـق
اسرح عليـه ولاتحـن الوطـا بـه
اجنب عسى دربك ودربـه توافيـق
صلهم ترى الممشى يبي من هقابـه
خص الى زانـت دروب الطواريـق
انص السديري زبن من هو لجابـه
سعد الركاب وسعد اهلها من الضيق
سلم عليه اعـداد منشـي سحابـه
وما ورقت لشجار من الوبل توريـق
قله ترى فعله فخـر مـن حكابـه
فعل على عـزم الردييـن ماطيـق
ثم ثنهـا ياحمـود فهـل الحزابـه
دواسـر قامـت بفعـل المطاليـق
سلـم عليهـم كـل منهـم بنابـه
سلام احلى من غبـوق المفاهيـق
ياويش اقول بمـدح سربـة اذيابـه
يوم استناخ الفرت ثم نشف الريـق
تعصبـوا والكـل يضحـك بنـابـه
وقالوا لي ابشر بالفرج ساعة الضيق
الفـرت حطـوه الذيابـة انهـابـه
كـل يعلـق نبلتـه فـوق تعليـق
شالـوه ربـع للخطـر ماتهـابـه
حتى الكرد شالـوه ماواحـد عيـق
كل يقـول الفـرت عنـدي وانابـه
خوينـا مايلحـقـه دوم تعـويـق
يالبيـض ياللـي تنقـش الخضابـه
بالله عليكـن للنشامـا عشاشيـق
ياكيـف ممدحهـم وازيـد الثنابـه
من حد,,حايل,, لين حـد العواليـق
مدح علـى فعـل ينومـس جوابـه
ماهـوب حكـي مايعـزز بتصديـق
يستاهلونـه بالثنـا والوفـا بــه
مدح الى جا الصدق ماهوب تلفيـق
ويقول الشاعر شلعان الودعاني في هذي القصه القصيده طويله هذا شي منها يقول:
قصت الشمري ياناس محلاهـا
يوم ثور عسام الجـو دخانـي
فوق سيارته والقـوم تشعاهـا
اجنبـي وحيـد مامعـه ثانـي
قل عزم المكينه ونقطـع ماهـا
قال هذا قعـد مافيـه عقلانـي
ياوداعيـن بحرقهـا وبنساهـا
والعوض عند ربي عالي الشاني
عودولـه ولا واحـد تعـداهـا
حذفو بالهدوم طيـور حورانـي
شلحوها بني عمـي وشلاهـا
لابـة فالقـا ماهـم بـذلانـي
والقنابـل تخطفهـم شظاياهـا
ماختلف واحد من لاد ودعانـي
حملوها ونار الحـرب تصلاهـا
اشهد انهم مناعيـر وشجعانـي
عقب يومين في نجران ملفاهـا
وشترو نقصها من سوق نجراني
ماتعـدو مكانـه ليـن شداهـا
وشتغل صافين ماهوب خربانـي
ذي سوالف بني عمي شرحناها
ماضياتن لهـا فعـل وبرهانـي
يازين فعلهم والله انه يشــــرف
العرض المتطور
