أبشرك..قلبي نسى طعم الآلام
نموت و لكن..ماتموت الكرامة
دامك نويت الصد..فالوعد قدام
من يومنا حتى تقوم القيامة
ياللي تقول..في غيبتك حدي أيام
و يرد قلبي..يشتكي من غرامه
بهديك للهجران عام(ن) ورا عام
لاعاش راسي..لو رجع في كلامه
لي قلب..به جنة..وبه ساحة إعدام
كلن نحطه..وين نعرف مقامه
و إلا أنت عادي..لو رمى رمشك سهام
يرمي و لكن..صعب يبلغ مرامه !
حولي قلوب(ن)..كلها حُب و هيام
و أعرف حلال الحُب..و أعرف حرامه
كم قلب يتمنى وصالي..ولا رام
كم قلب ينسج في الخفوق..إحترامه
الفرق..مابين الحقيقة و الأحلام
مثل المدى بين السما..و الغمامة
غيرك في قلبي..حط له بصمة إبهام
حاز الغلا كله..و حاز إهتمامه
مشاعري له في حَرَمْ قلبي..إزحام
من زود حسنه..و الحلا و الوسامة
أما أنت..حبك مات..في ساحة إعدام !
و إرتاح قلبي من جفاه..و غرامه
العرض المتطور
