مايبل الحب ريق!!
أمحلت كـلَّ الشَّوارع مابقى غير الفتات
واقـفٍ أجـمع يديني من نهايات الطَّريق!!
كِل طولي ما يساوي "شي"في عَرض الجهات
ما أوسع الدنيا فـِ عيني ولامشتْ رجلي تضيق
علموني الهرج أسولف متّ من كثر السّكات
وانفضوا بعضي وبعضي لاصحا وجهي يفيق
ماتلاشى غيـر وجهك في تعابيري ومات
وما تـمادى في عيوني غير شارعنا العتيق!!
والوجع والحزن الأغبر والتوحد والشتات
وانصهار الناس فيني وانكسارات الصديق!
وأنا واقـف في مكاني لاحِراك ولاثبات
يـعني لاني عاليباس ولاني في الغبَّه غريق
((وأقبلت واللي معاَهَا من البنات مسيِّرات))
وأدبرت واللي وراها زول وأنفاس وحريق!!
هكذا طبع الصَّبايا الفاتنات المترفات
يتركون الصَّبّ ذايب بين همّ وبين ضيق!!
وليه أنا أنثر قصيدي في تضاريس البنات
يابـعد كل الصَّبايا مايـُبلَّ الحب ريـق
ويش يبل الحب في جوف العروق الناشفات
وكِلِّ عرقٍ من عروقي لا يملّ ولا يطيق
وليه أنا أنسج وأخيط في جلود المومسات
الأغـانـي لــلغـواني والمـنايـا لــلــعــشيق!!
العشيـق اللي تبعثر بين همَّ الأمسيات
وبين أسراب البلابل وبين ماضيه السحيق
ودامها الدُّنيا بخيله وشح وجه الذِّكريات
رحت أدور في عيوني بعد ما غبتِ رفيق!!
الشاعر
فواز بن خضر الياسي الهذلي
العضو الأكثر نشاطاً هذا اليوم 
العرض المتطور
