أعتقد كل شخص فوق الـ 18 مر على هذا العصر الأغبر .. واللي مامر على هالعصر لايكمل يقراء الموضوع علشان برستيجنا مايهتز
هالزمان راح أقسمه لأيااااام .. علشان تعيشو الجو
أياااااام الكشخه
الكشخه فينا تلبس الطوق والبكله والشراب القصير أبو كشكش وحاطه من الروج الأخضر السحري "اللي بعد خمس دقايق يقلب أحمر .. كأنها مصاصه دماء .. " ماعاد الشكل يصير برئ هي وذا الروج
واللي تلبس الفستان المكسره "اللي من تحت مليان جيبون" اللي حزام الفستان يسحبل بالشوارع وله كتافات أسفنجيه عاليه الجوده
وماننسى طبعاً مبدا الزي الموحد عند العائلات .. ثنين ولاثلاث من البزارين لازم طقم
اياااااام بقاله أبو سعيد
الوحده منا تركض للبقاله بقميصها القطن "اللي شاريته لها أمها من البياعه اللي تجي عند بابهم " تشتري ببسي أبو كيس <-- بنص ريال .. وتشتري معه البسكوت الأخضر اللي بالموز <-- يالله كرم النعمه
ولا أيسكريم أربعه بواحد ابو ريال "البرتقالي - والأحمر - والأخضر - والأصفر" اللي يتقاسمونه ورعان البيت كلهم ...ويحظها لو صارت العلبه لها لحالها يقعد ثلاث ايام بالثلاجه وهي تلط منه
أياااااام التصرفات الهمجيه
حدث ولاحرج .. مدري عاد هالتصرفات توارثتها الأجيال ولا لا
بقلوب صافيه كنا نزعل ونرضى من اللي زعلنا بسرعه بس شرط أساسي أصبعه الخنصر لازم يتصالح مع أصبعي أنا <--
لا بس هذي تهون عند طريقه الحلف " لاحول ولاقوه الأ بالله " حط أصبعك في فمك ولازم يمتلي الأصبع من السعابيل وبعدين مردغ فيها حلقك .. الحين تصير صادق
أما اللي بيعلم أنه تسذوووب يمد لسانه ويطير لسانه بأصبعه <--- ماأعتقد اني وفقت بهالشرح
أياااااام التلفزيون السعودي
طوووووووووووووووووط <-- فجرت أذانيكم صح ... والشاشه الملونه ... ولا ترن تن تررررن ترررن <-- هذي النغمه لمى يحطون شاشه الساعه .. ومن تجي عشر .. يبدا القران وبعد أفلام كرتونهم الماصله
أنا أذكر بشار اللي ضيع أمه والدببه اللي بمدينه النخيل وحبيب قلبي الليث الأبيض <-- ماني بصاحيه كنت أحب الحيوانات مو الأوادم .. بس تطورت وحبيت ليدي وسارت ليدي وبعدها روبن هود وزورو وهايدي وسالي .. هذا التطور يمكن على اخر ايام الأبتدائي
وصرت أتابع أفتح ياسمم .. وبدر وأنيس .. ياحبي لهم
<-- الحمد لله والشكر من بعد شخصيات الكرتون .. صرنا نحب أنيس
وبعد هالتطور صرت أتابع برنامج أطفال القصيم وأطفال المدينه وأغانيهم الماصله
لا والأفلام الهنديه .. اللي كانو يجيبونها على القناة الثانيه
فلم الولد والفيل
وفيه فلم ثاني اللي الحرمه تقطع العقد اللي لابسته عند المعبد <-- يعني طلقت زوجها
متى يجي بابا
يجي الساعه سته
راكب ولا ماشي
راكب باسكيلته
حمرا ولا بيضا
بيضا زي القشطه
<-- العن ابو المصاله
سويره راحت البر
تجيب العيش الأخضر
واتحطه بالصواني
على جية خوالي
خوالي يا دلالي
أياااام الدلاخه
أنا أشهد اني كنت اكبر دلخه في تاريخنا .. بس الحين يوم كبرت .. أذكى مني مافيه
<-- لايكثر
أياااام المدرسه
أول يوم دراسي .. والكرتون الكبير اللي يجيبه ابوي من المكتبه وكلها محتوياته من ذوووقه " درزن دفاتر أبو ثمانين ولا ستين _ فروووخ لتجليد الدفاتر _ برايه أم مرايه وأشياء لاتعد ولاتحصى .. ويجي دور الهجوم على الغنائم <-- أول مره يشوفون شي جديد
لا والسلام الملكي حق المدرسات .. من تدخل المدرسه الكراسي والطاولات يبن ينحاشن من اصوات البنات " شرفتينا ونورتينا ياابله نوره ...... نوره ياعيوني ياللي لابسه اليموني لابسه الساعه اللماعه تسوى كل الجماعه
أيااااام الممنوعات
كان الأتاري من ضمن الممنوعات في بيتنا .. أو بمعنى أصح مايجي من نفسه لازم له طراره من البزارين علشان يسمح له دخول منزلنا ..
أذكر كل ماقلنا لأبوي نبي أتاري .. قال لنا الأتاري مااسمع له طاري
وبعده سيجا والعائله ولعبه ماريو
كان الميك أب عيييييب
بس أزين شي ان طلعت الشارع عادي
كانت فيه أشياء كثيره ممنوعه بوقتها ... كل ماأذكر أني أصيح لمى يرفضونها أحس ان البرائه بتشقق بعضها
ملحوووظه
* واللي مامرت عليه هالأشياء ولا عاصرها .. لايتفلسف
وبـ الأخير :.
يـآليــــــــــــــــــت ذيك الايآم ترجع
يووووووووووووووووووه ياربيييييييييييييييه بغيت أصيــــــــــــــــح صراحه أيام ولا أحـــلى
ونسيتي بــا بــا فرحان<<<يالبـــى قلبه^_^ ونسيتي أحلى فلم كرتون سناااان يابعدي والله يا سنان
هههههههههههههههههه لا وأفلامهم من زود الطوع مايقولون دعونا نشرب الخمر يقولون(دعونا نشرب اللبن )هههههههههههههههههااااا يا عليهم ترجمه بريـــــئه^_^
يابعد ملي
كتبتي حياتنا بكل حذافيرها
اهئ اهئ وربي اشتقت لذيك الأيام أحس اذا أحد منكم الحين قال لي (بكت بكت) على طول أبكي!!!!
أيـآم الـورعنه (الطفوله)
العرض العادي
