أفتش وجيه

معرض الوسام · 02-19-2014, 11:36 AM

تبي ترحل ؟!
أحسّك / يد ما تقوى على تلويحة التوديع !
حراااااام تضيع .. و تضيّع بـ صدرك :
أمنيات و حلم ..

تبي ترحل ؟!
تفضّل روح ..
و خلّ اللي هقى بك : عمر ..
بعدك (إ)من الجفا : مجروح ،
و لكن قبل ما ترحل !!
بقى عندي :
سؤالين و حكي فاضي :
أنا بـ ألملم أغراضي ،
و إنت إقرأ الكلام و :
رووووووووح

ليه تصغر ؟!
في صدور : الأمنيات !
و ليه تكبر ؟!
في عيون : الأسئله !
يا .. (إ)متكبّر
كل حلمٍ كان بك أخضر / تصفّر ..
لا تأثر
الزمان مبطي كساه اللون الأغبر ..

شوفني كيف أتبعثّر
في طريق اللا رحيل
حلمي الوردي تنثّر
لملمه لو فيك حيل

و اتشجّر :
غصن أصفر /
يشبه لـ وجهي و أنا ( أنتظرك ) كثير
شاحب لـ حدّ الذبول اللي يسولف عن :
مماته بالأخير ..
و غصن أخضر /
ما طواه اليأس / يرسم يرسم للأمل :
إحساس عصفور و يطير ..

و أنادي لك :
و أجيك (إ)من البطا مشتاق
و عيوني جيش من أشواق
و أرتّل للحنين : إصبر
هنا : موعد
هنا : نشطب طواري فراق
هنا : نكتب ( حكي عشاق )
و مثل كل مره يا يا : مدري !
تكون اللي نساني في /
يدين الآه و أعطاني :
( مع دموعي وفا و عناق ) !
و أرتّل للحنين : إصبر
هنا : موعد
و مثل كل مره يا يا : مدري !
تخون الوعد !
و أصير لـ وحدي الوافي
و مع : خيبة حنين / أقعد ..

عمق

رحّ قل للأحباب ياللي شلت مرسولي
إني إلى الحين مع ذكراي أشهقهم

ياليت كل اللي يبيهم خاطري حولي
عشان لآ إحتجتهم.. أقدر أعانقهم

بعيد و أسمعهم بـ شوق(ن) يغنوا لي
أرهقني البعد عن داري .. و أرهقهم

أفتش وجيه .. هم ذولي ؟ ما هم ذولي !
في غربتي .. نفسي ألقاهم و أسرقهم

لا أحدن يلوّم علي إن طحت من طولي
فاقد حبايب .. وفاقد ناس أعشقهم !

هذا إشتياقي .. وذا حزني .. وذا قولي
أشتاقهم حيييل .. و أولهْم .. و أشفقهم

يا ضيقة الصدر بوحي عني .. و قولي :
لو هي بكيفي و لا لحظه [ أفارقهم ] !