[ ديوآن الشـآعر / عيادة الجهيلي ]

يابدر كيف الحال وشلون الهقاوي يابدر=ضاعت وهي تشكي من الرمضاء ومن جور الضماء
من قال إن القَدر والتقدير في وسط الصدر=هذا عمَى واللي فزع له شخص بالشدة عمَى
القَدر عند اللي يبل الريق ويهد الجَدر=في ساعةٍ تعْرف مقامك عند حامين الحِماء
اما سوالف ناقتي درّت وعيّت لاتِدر=مثل السؤال اللي جوابه للأمانة ربما
والشاهي اللي ماخدر ياعل عمره ماخدر=ماني مكلّف في مجرات السماء واهل السماء
في وادي الازور وفي وادي الاديرع مع مدر=السيل واحد لكن الوجهة حدودٍ وانتماء
والفعل فعل اللي يطق الصدر وتشوف القدر=في ليلةٍ تاه الحسود ومات مصّاص الدماء

ياللي تبشّرْنا بطيحة ولدعم=عساك ماتبطي تطيح بمطيحه
لاصار ماعندك حميّة ولا دم=اقلط على راس الردَى والفضيحه
نموت ما سِمْنا طنانا على كم=ياللي تدوّر للسوالف منيحه
مهما يكون الجرح والغبن والهم=من شان ابن عمي نحرْت النصيحه
ومنهو تكلّم فيه بقول له قم=لمناطحٍ بين النطيح ونطيحه

قروب ابوحصة اللي بكل وقت ومكان=اصبح حديث التواصل في قلوب الجميع
قروب ناجح ومسعدنا ووضعه أمان=على فئات العمر والعمر زهرة ربيع
يزرع بنا الإبتسامة دون وصل وضمان=والضامن الله وسبحان العلي السميع
كم اسعدونا عقب جور الجفاء والزمان=عسَى المعاريف من بين البشر ماتضيع
قروبهم اجتماع احباب دون احتقان=الله يديم السعادة والمقام الرفيع
لولا المحبة فلايوجد غرام وحنان=ولولا الأوامر فلا به شخص يمكن يطيع
شكراً لكم كثر شكر المعْرفة للكيان=وكثر المسافة مابين الأندلس والبقيع

ياشاطي الآمال ياعزوة البيك.=مافيك لاخوّة ولابك مروّه
جيتك وانا اللي ماعلَي من معاليك.=وتدري بوضعي ماهو الوقت توّه
ما اقسّى من الحرمان إلا مواليك.=لامن قَلَب عقب الوفاء والأخوّه
الوضع مايحتاج خطّة وتكتيك.=ولا انتا بحاجة شخص عقبي مْفوّه
الحين لو أذّن على راسك الديك.=الديك مايدري براسك وجوّه
لكن على الله وصدق الأيام ينبيك.=عن حاتم الطائي وخيله وضوّه
توهّقت قبلك شيوخ ومماليك.=واللي تبي تسوّيه سوّه وسوّه
مااحْدٍ عرف وشلون تفهم مباديك.=لاصار رملك في حضورك مشوّه
تلاشت ايامي وطابت لياليك.=والصقر من عقب الهدد صار بوّه

عزنا بطبعنا والكل داري.=والمكارم من خلقنا نحتميها
الكرم فينا ماهو أمرٍ وزاري.=ذي طبيعتنا ومجد العز فينا
جودنا ماهو بحاجة شخص قاري.=الشعوب تشوف فينا مالديها
والتراحم بيننا غيث وصحاري.=تشهد ارض المملكة واللي عليها
والشجاعة ماكسبناها اضطراري.=جبلةٍ فينا ونأخذ في يديها
والمراجل ساسنا والفعل ضاري.=والأصايل للمصايب نعتليها
سطوة التاريخ والوهج الحضاري.=مايَبِن غير السعودي يحتويها
من مؤسس دارنا والصيت ساري.=عن علوم المملكة ومواطنيها

تمرني آهآت الاوجاع ياشوق.=واضحك ولو جرح الزمن بي تمكّن
ياشوق لو وجه الحياء صار مدفوق.=ماهو أنا اللي لاتوهّق تمسكن
أما أعيش لفوق واموت انا فوق.=والا الغياب اللي من الشمس فكّن
مبطي وانا من سطوة الحزن مخنوق.=ومبطي علي صكّات الأيام صكّن
ومبطي سهرت بْهَم وانام وافوق.=على الهموم اللي بالاضلاع ركّن
ماعاد للمنطق محبّين وحقوق.=الشكوَى لله كان الأوهام شكّن
بكرَى نشوف وستر الأقلام مفتوق.=واوراقنا البيضاء عن الحبر زكّن

رحلت ياساس الكرم والمواجيب.=من عرفتي لك كل يومٍ عزيمه
يبكي عليك الجود والصيت والطيب.=وجبال حايل والعيون اليتيمه
الامعط العردان ستر الرعابيب.=في ساعةٍ فيها البلاوي عظيمه
لوغبت عنّا ذكر طرياك مايغيب.=ياابو اليمين الوافية والكريمه
يابوهلا يابوكثير التراحيب.=ياابو السنين المقبله والقديمه
ياابو المراجل ياحصان الاطاليب.=ياابو النوايا الطيّبة والرحيمه
صحيح مااحتجتك ولايلحقن ريب.=في وقفتك يوم النديم لْنديمه
يابوعبيد جروح صدري معاطيب.=عليك لاهبّ البراد ونسيمه
الشعر قلته للضلوع المحاديب.=وتقول مايكفي يامال الغنيمه
إكتب وخل الأرض تخلَى من العيب.=من قبل لايِدْفَن وقار الحشيمه

(صـيـحـة ألـم )

يارْشيد ماالومك على فقد من راح.=الله يلوم اللي بفقده يلومك
انا ادري إن الحزْن في داخلك صاح.=صيحة ألم فيها تعانق همومك
يارْشيد جرحك غير مجموعة جراح.=دمعك على كتفي وبلّل هدومك
يارْشيد فرقَى مهجة الروح ذباح.=لكن نبيك وكلّنا في لزومك
يارْشيد لو صبر الجمل ودّع وطاح.=يارْشيد تكفَى لاتهاوَى عْزومك
يالله عسَى سلمان في خير وارباح.=عند الرحيم اللي بْيِدِه قوت يومك
في جنةٍ مابه سوَى غير الافراح.=وتشوف بشرَى الخير في وقت نومك

( دار الكرم )

عزنا بْطبعنا
وياهلا في ربعنا
والعَلَم فوق الجبل
والوفاء من نبعنا

السعودي مايهاب
بالحضور وبالغياب
والعلم فوق الجبل
ومن نصانا مايخاب

دارنا دار الكرم
اعتلت راس الهرم
والعلم فوق الجبل
بين طيبه والحرم

مجدنا المجد الأبي
وصيتنا ماهو سبي
والعلم فوق الجبل
والوطن له مايبي

والأخوّة بيننا
ماتخالف ديننا
والعلم فوق الجبل
نرفعه بيديننا

ديرتي دار الجدود
عن مساحاته نذود
والعلم فوق الجبل
وكلّنا أمن وحدود

السعودية شموخ
للعدو لا ماتنوخ
والعلم فوق الجبل
مرحبا بارْض الشيوخ

ناقف لكل الظروف
ولا لحقنا أي خوف
والعلم فوق الجبل
وننثني دون الوقوف


#عيادة_الجهيلي

صــالات الأمــل

كلٍ يبي يعذرب على عيال الحرار=ووقت اللقاء مافيه موعد للقاء
وكلٍ يقول إني أنا شمس النهار=وكلٍ يقول اني على وضح النقاء
وكلٍ يقول اني أنا شبّاب نار=وكلٍ يقول اني تعبت من الشقاء
البارحة مرّيت سوق الاعتذار=ولقيت فيه اللي هقيت ولا هقا
وسلّمت والتسليم بعد الاختبار=على الذي ينزل ولا مرّة رقا
ما رد واحلامي على نفس المسار=حسبي على احلامي عساها للبقاء
ياضلعي الأيمن على متنك غبار=وياضلعي الايسر ظلالك إتقا
اشوف صالات الأمل والإنتظار=وصبري علّي ماشح لكن ما سقا
بيْدَي مفتاح الطواري والقرار=لكن معي نبل المبادي والتِقَا

( صـدمات الذهووول )

ارحلي مالك بقلبي مكان ولا محل.=ولابقَى لك عند مغليك من فترة قبول
الغلاء اللي حافظه لك من ضلوعي رحل.=ماترجّعْه القصايد ولا انصاف الحلول
ابعدي بِعْد الهقاوي علَى مشاهد زحل.=في نظر من ضامه الوقت وعيال الخبول
الغرام اللي احتويته من فعولك بحل.=من طبايعْك الغريبة على مَر الفصول
شايلك برموش عيني عن اطراف الوحل.=وانتخيت وقلت ياضلع قول اللي تقول
لكن اني ماتوقّعت وبلك انتحل.=غيمة الأرض الجميلة على حسْب الميول
مابقَى لك قدْر عندي وتقديرك ضحل.=وكل حاجز بيننا ليت من ربي يحول
ماعليه خْلاف لو جسم محبوبك نحل.=المهم اني تماكنْت صَدْمات الذهول

هــآجوسـي ومـوّالي

يامرحبا بالحبيب اللي علَي غالي.=ترحيبة المملكة بْحجاج بيت الله
أشتاق لك يابعد حيي هوَى بالي.=مثل اشتياق السعودي للوطن كلّه
يازين عقبك ترَى سم الشقاء حالي.=والعين ماغمّضت من بعْدكم لله
حبّك أسرْني وطيفك دايم قْبالي.=ياويل قلبي غرامك ياالغلا تلّه
ياروح روحي وهاجوسي وموّالي.=ياعمري اللي ثمان سْنين محتلّه
خذني من اوّل لقاي لآخر آمالي.=الله يحيّي نباك وحي هاالطلّه
أنت السعادة وقَدْرِك مرتفع عالي.=وسيوف عِشْقك بْصدري يالغضي سلّه
لاواهني الصِغِير الداله السالي.=ماصابه الهم والاحزان والعلّه