بسم الله الرحمن الرحيم
هذه ابيات رد على الشاعر الكبير محمد ابن سرور المطيري والذي
اثنى على شمّر بمزاين قبيلة شمر ممثلا بالامراء اللغيصم ..
ويقول في ابياته ..
بسم الله ابدا واتعوذ من ابليس=والوذ به من كل مارد وشيطان
يوم اقبل مزاين طوال النسانيس=تيمموه البدو من كل الاوطان
تباشرو بالجايزه يالسناعيس=العز ياشمر طليقين الايمان
تاريخكم يدرس والامثال تدريس=ميزانكم يرجح على كل ميزان
وساع الطعون ان ثار عج المقابيس=كبار الصحون مشبعة كل جوعان
عادتكم ياكاسبين النواميس=الفوز ياهل الفوز في كل ميدان
سفيركم خالد محدّ المفاليس=يوم ارتكا للحمل شاله بليهان
لعيون شمر ماحسب للقراطيس=ولا قال ابذخرها لصكات الازمان
قال الطنايا حقهم جدعة الكيس=تمثيلهم في كل مايرفع الشان
ولا هي غريبه يابعيد المراميس=المجد لك ياعاشق المجد عنوان
اهلك قبلك روس لابه وفريس=لغاصمه شيخان من ترث شيخان
هم مقدم المسعود يوم المتاريس=ومزبنين اللي عليه القضا حان
على ظهور الخيل والضمر العيس=ياما تناخو دون زينات الالبان
حفيد من ياخذ عليهم مراويس=عواد لا منه غشا الجو دخان
ابوك من يطلق قيود المحابيس=صعب المراس معرب الساس جدعان
واليوم ياخالد براسك هواجيس=تبي تمثل لابتك لنك حصان
تمددو ثم جمعوها القرانيس=اللي لهم خبره قديمه وشيبان
بالزين والله كاملات المقاييس=الوانهن ماهي بحي الله الوان
صفر(ن)تقول من الشبك والقطاليس=بالعون هن اللي يسرن الاعيان
لا طوح الراعي وجنه كراديس=يشوش معهن كل مطنوخ بطران
مرباعهن لينه وحمر الطعاميس=ومقيضهن لا ركب القيض فيحان
جمعتهن بالمال يامخلي الكيس=من طيب راسك ماتغاليت الاثمان
اقلهن قيمه لو انّا نبا نقيس=تجيب قيمتها عماره وذيدان
كنك تقول اني صبي السناعيس=ابغا اتحدا الكل من غير حقران
لله درك يامحد المفاليس=يابن لغيصم يامواريث جدعان
------------
وهذا هو ردي على الشاعر : محمد ابن سرور المطيري
-----
بسم الله ابدا لجل طرد الوساويس=الواحد الفرد الصمد ربّ الاكوان
من بعده ابدا الترجمة للاحاسيس=وتسمو حروف(ن) تنقل احساس الانسان
يوم ابتدا غرس الشرف للغراريس=اللي لهم في هامة المجد مسكان
مطران في وقت المعارك مدابيس=يهتز قلب الضد لا قيل مطران
افعالهم ترفع حديث المجاليس=مثل الربيع ليا ارتوا غيث الامزان
للعزّ حمران النواظر عواسيس=ومحصلين النعم حجه وبرهان
تاريخهم لو ينكتب بالكراريس=يطغى على كل الورق فوق الامكان
رمز الشجاعه حقهم فوق ماديس=ماينثنون وروسهم فوق الامتان
ابطالهم ماتلتفت للهلابيس=ومثبتين الحق بالسيف شامان
اقولها ماهي دعايه وتدليس=اقلّهم يوصف على طير حوران
والشاعر محمد عسى مايرى بيس=الشاعر ابن سرور هو راع الاحسان
جاب الصحيح ولا دخل باللواليس=اثنى على كل الطنايا كحيلان
من ضلع اجا واطراف سلمى المراويس=الشكر يرفع له ومن حد برزان
واقول شمر متعبين المحاميس=يبدون لك ياطيب الساس عرفان
رد الثنى ماقيل خلف الكواليس=فاضت مشاعرهم رضا قلب ولسان
اما اللغصيم للمكارم حراريس=متكاتفين(ن) بينهم نعم الاخوان
مقدارهم ملي القلوب المحابيس=النعم بشديد وخالد وسلطان
من ترث ناس(ن)للمعارك مقابيس=فرسان من فرسان من ترث فرسان
وخيولهم ماكعكعت بالمحاويس=ماكعت خيول النشاما بالارسان
من روس الاسلم روس والراس ماريس=روس(ن)تروس الروس في كل الازمان
ولا تابعو ليلى ولا تابعو قيس=منسف وسيف وجد من طبع جدان
مالبسو هرج(ن)ماهو صح تلبيس=هذا قسم باللي فرض خمس الاركان
وشمر على الكايد لهم بيت تحميس=اضرب على الكايد ليا صرت بحلان
ماقدسو من يرفع الخشم تقديس=ولا حسبو لمروّج الخوف حسبان
افعالهم شدت حروف القواميس=مالحقو ناقص من فلان وفلان
الشاعر محمد عسى مايرى بيس=الشاعر ابن سرور هو راع الاحسان
صح الله لساانك عز الله قصيده وافيه من رجال وافي
صح الله لسااانك ولا عدمتك يا بعد روحي رد محبوك
لا هنت ولا هفيت يا الغالي تسلم وبيض الله وجهك
وصح الله لسان الشاعر محمد بن سرور
على أبياته الأكثر من راائعه
لا هنتوا لا هنتوا
العضو الأكثر نشاطاً هذا اليوم 
العرض العادي
