اشوف ايامنا شانت علينا لعنبوا جده

[poem=font=",6,orange,bold,normal" bkcolor="black" bkimage="" border="double,7,skyblue" type=2 line=0 align=center use=ex num="0,black""] انا سديت عن قوم بوقت الضيق ماسده=وعن بيض الفعايل بالعرب جانا رماديها
ولا هي غلطة اللي شال معروفي ولا رده=خطا اللي يآمن الحيه ويرقد وسط واديها
نوايا الخير مابه خير لاهل الجود والمده=ولاتوفيك عند الناس لاضاعت مباديها
اشوف ايامنا شانت علينا لعنبوا جده=تثور رماحها بالغيظ لاغابت هناديها
هقيت اقدارنا تجمع خيوط اللين والشده=وعقب ازعاجنا يشدوا بجول الطير شاديها
ولافادت تحاليل الحشى والقلب والغده =لكشف العلة اللي بالدجى ترجم هواديها
صبرت اعوام بس الصبر غلق وانتهى حده=ومزبان الردى والكذب ماتقضي دواديها
واخاف اللي بقى بأيامنا مثل التي عده=وبوقات العرب للروح زادت في تماديها
نعم كديت لكني خسرت وضاعت الكده=وصارت قوة الممتاز الاحمر مثل عاديها
مع ان الروح باللي فات تلعب والهوا ضده=وضدي لجنة الحكام تزعل يوم اناديها
نطالب بالبلنتي والحكم بالعدل ماوده=مع ان خصومنا ردت هدف راسي بآياديها
وخصمي يرتجي له هجمة للقول مرتده=وحدى رجلي عن التهديف والتسديد حاديها
وكل الناس والجمهور عن تشجيعنا صده=تساند بالمدرج سادة الثروه وناديها
وبانت دقة التمرير عند الخصم واشتده=وغلطات الدفاع الصلب لا يمكن تفاديها
وبانت سرعة الجنحان صوب القول وامتده=على اللي نال دوري حاضر اللعبه وباديها
وزاد الضغط توجيه المدرب لعنبوا بده =يهددها المترجم في كلامه مايهاديها
لما سددت صاروخ شلعهم واحرق القده=وحاس القوم في خلطة لبنها مع زباديها
وترك كبده بمسمار الحسد والحقد منقده=وغطت نغمة الراوي طلاله مع عباديها
واذا ضاقت مطاليع الفرج للروح واحتده =وبيبان المراجل دوننا صكت بناديها
وباب الرزق لو جاه الحسود النذل ما لده=من اللي ساق مزن الوسم رايحها وغاديها
وانا لولا المراجل كان رزق البطن وش نده=ولا فزعة قرايب روح روحي مع عواديها
ودام الطير والشيهان يجفل ساعة الهده=وجول الصيد مايقوى على طعنة ثناديها
سلام الله على اللي بالعذارى ناعم خده =لها بلجيك زينات البنادق مع كناديها[/poem]