بسم الله الرحمن الرحيم
كان لفلاح بن نمش الديحاني المطيري مجموعه من الاولاد ... فتخاوى حدى عياله
مع واحد من جماعته يبون الرزق والكسب.. وهم بطريقهم لقولهم واحد عتيبي وقال
انا بعد رايح ادور الرزق .... فتعاهدو الثلاثه على الخوه ...
وبهكالليله البارده حنشلو على قبيله وكسب العتيبي فرس اصيله اما المطران
ماحصلو شي .. وهم راجعين لديارهم مرو بالزلفي واستضافهم امير الزلفي
بهاكالوقت محمد الراشد البداح .. وبعد مامشو من عنده وناموا بالطريق قام ولد فلاح
بن نمش المطيري وذبح العتيبي وخذا فرسه ... ورجع به فرحان على اهله ..
ويوم وصل لديارهم وشاع خبر كسبه للفرس اللي الفرسان يناظرونه باعجاب ....
وبحدى الايام شافه حدا الدوشان وعرفه .. وقال هذي من سلاله فرسي اللي سرقت
مني فصوت لراعيه المزيف اللي هو ولدك يافلاح وخذها منه ..
وبعد مده اهل العتيبي فقدو ولدهم فراحوا ينشدون عنه .. وجاهم علم ان ولدهم مر
بالزلفي فراحوا للزلفي ونشدوا الامير وعلمهم بالسالفه انه كان معه ولد فلان
وفلان ... فراحوا العتبان على مطير وجو على بيتك يافلاح ... ويوم درا الولد ان اهل
العتيبي جو خاف من الفضيحه وهج للكويت .... فاتضحت الامور وعرفوا انه ذابح
الولد وماخذ كسبه .. فارسل ابوه (( فلاح )) حدى عياله وقاله رح الحق اخوك وهات
لي راسه وفعلن راح وذبحه وجاب راسه لابوه ورماه قدام المطران فقال ابوه ابيات
موجهه لولد ولده صالح :
ياصالح افهم يوم ربـي عطانيـك
احفظ دروب الطيب هي والشكالـه
حيثك صغير وتفهم اللي يوصيـك
الطيـب بيّـن والرزالـه رزالـه
لاعاد انا يابوك شيبـت وارجيـك
ترا الولـد طيبـه يبيـن بفعالـه
اجناب وسط اجناب كل(ن) يراعيك
والعود يفرح يوم تمـدح عيالـه
عمك ذبح عمك عساهـا توعيـك
عند الخوي جازاه ياللـي جزالـه
يرفعك عند الناس لاحـل طاريـك
رفع مجالـك يرفـع الله مجالـه
احرص على درب النقا مثل اهاليك
ماكل من يبقـي المراجـل ينالـه
تشره على البيضا عقب ذبح غاليك
لو كان هو غالي رضينـا زوالـه
قبلاتـــــــــي لكم
عشوووق
العرض العادي
