سـرى اللـيل والخافق غـثـيـث الزمن حـاشـه=سـهـيـرن الـيـامـا يـشـعـل الـصبح فـانـوسـه
اذا نـام جـفـنـن جارح الـعــشــق مـانـاشــه=تـوالـت عـلـى قـلـبــه بــلاويــه وهــجــوسـه
اراقـب نـجـوم الـلـيـل والـنـاس بـفــراشــه=سـهـيـرن لـمـا يـظـهـر لـنـا الـفـجـر في قـوسـه
نجـوم الـسـمـاء كـنـه عـن الفـجـر مـنحـاشه=وتـسـمـع لـحـن سـجـع العـصافـيـر بـغـروسـه
واخـلـي فـراشـي والـمـعــالـيــق مـنــداشــه=وابــاعـد عـن ربـوع الــشـمـاتـات وجـلـوسـه
بـصـدري مـثـل طــق الشـواكـيـش بـقراشـه=او الـلـي تـطـق طـبـول الاحـبـاب بـعـروسـه
واذا ضاق صدري يـنـبـع الـقاف من جـاشـه=واراهـن عـلى عــدل الـقـوافـي ومـنـكــوســه
اجـنـب هـزيـل الـقـاف والـسقـط وقـشـاشـه=واجـيـبـه عـن غـلـوط الـشواعـيـر مـحـروسـه
نـقـيـتـه عـن الـمـنـقـود فـي طـاش مـاطـاشـه=ولااشـريـه مـثـل الـلـي قـوافـيـه مــدسـوسـه
ولااسـري علـى قـاف الـعرب مـثـل خـفـاشـه=سـروقـن لـمـثـمــون الـقـوافـي تـقـل سـوسـه
ولايـسـتـحـي يـنـشـر خـزيـزه عـلى الـشـاشه=غـدى الـشـعـر بـيـعـة تـاجـرالخوخ والكوسه
بالاشـعـار عـدي كـبـتـن الـقـاف والـبـاشــه=ولاهـي مـن امـثـال الرجـاجيــل مـبـخــوســه
اذا شـفـت هـمـي بـالــحـشـى بـان نـتــاشــه=قـلـبـتـه وصـارت جـوهــرن لاح بـطــروسـه
لـعـلـه يـعـــلـل خـــافــقــن ثـار لـــولاشــه=هـجـوسـه تـخـلـي ضامـري دايـمـن حــوســه
سـبـايـب عـنـودن بـالـحـشــى ثـار نـهـاشـه=ولا مــر بـي مـثـلــه مـع الـبـيـض وجــنــوسـه
صـوايـب رمـوشـه كـنـهـا الـرمـي بـكـلاشه=والاعـيـان مـع سـود الـهـدب غـنـج ونـعـوسـه
مـع الـمـشـي ردفـه يـفـتـق الخـيـط بـقـمـاشـه=تـقـول الـمـلابـس فـوق الارداف مـمــسـوسـه
عـيـون الـمـهـاة الـلـي بـالاريـاف مـعـتـاشــه=وسـط فـيـضـتـن خـضراء نـديـه ومـشـمـوسه
يـذيـره حراك الغـصـن مـن عـاصفـن هـاشه=او الخـوف مـن قـنـاص الاريـام وعـســوســه
تـهـيـلـك عـيـونـه يـوم تـجـفــل مـن ادبــاشـه=ولاحـت لـه ازوال السـواريـح وحــسـوســه
مـثـل عـيـن ريـمـن حـطـت الـروح بـانـعـاشه=وصوف الـحـلا فـيـهـا كـثـيــره ومــدروسـه
بـوسـط الـعـرب كـنـه ضـوا الـبرق بـفـلاشـه=تـشـوف الـعـذارى عـنـدهـا تـقـل مـضروسه
لـك الـلـه فــلا هــبـنـا دروبــه ومــطـراشــه=ولـو عـاش فـي ديــرة صـلـيـبــه ونـاقــوسـه
ظـروفــه غـدت دون الـغـلا تـقـل مـنـخــاشـه=دروب الـهـوى صارت لـنـا تقـل مــعـكـوسـه
ومــن دونـهــا ضـرب الـمــدافــع ورشـاشــه=مـن الـلـي عــلـى راس الـغـلا شـال دبــوســه
لـمـا طـحـت مـع حـطــاب ربـعـه وحـشـاشــه=اريـد الـخـبـر عــن داعـج الـعـيـن بـفـلـوسـه
واشـوف الـعـرب مـعــنــا كـذوبــه وغـشـاشه=تـواصوا عـلـى روحـن مـن الهـجر محـمـوسه
وراس الـظـبـاء مـايـطـرد الـجــوع بـعـراشـه=ولا يـنـفــع الـضـامـي جـواحـيـر ورسـوســه
الا لـيـت لـو حـظــي مـثـل حــظ عـــكــاشــه=مـدامـه كــســب مــن سـيــد الـخـلـق نـامـوسـه
وانـا الـعـمـر اســدد ديـن الايـام مــن كــاشــه=واداري ربــوعــن كــنــهــا لــدغ نــادوســه
واراجـي عــنـودن فـوقـهـا الـنـاس مـهـتـاشــه=هـنـوفـن غـدت فـي قـاعـة الـبـيـت مـحـبـوسـه
غـدت نـومـتـي مــن غـثـــة الـبـال بـخـيـاشــه=حـزيـنـن عـلى الـلـي شـاقـنـي زيـن مـلـبـوسـه
ونـصبـر مــدام سـلاحـنــا صـار مـنــقـاشــه=مــدام الـزمـن يـركــي عـلـى خـافـقــي مــوسـه
العضو الأكثر نشاطاً هذا اليوم 
العرض العادي
