|
الناس لو حاولت تكسب رضاهم!!
الناس لو حاولت تكسـب رضاهـم
لا أرضيت واحد زعل منك عشرين
امـا تجاملهـم وتتبـع هـواهـم
والا تجنبهـم يقولـون مسكـيـن
هذا وأنـا مالـي مقاصـد وراهـم
مهما سمعت وشفت بمجرد العيـن
مالـي ورا عقالهـم واسفهـاهـم
لعلهـم منـي يكونـون راضيـن
واقدّر الوافيـن وادمـح خطاهـم
وابعد محاضيبي عن المنطق الشين
واطلب عسى رب العبـاد يهداهـم
واسعى لهم بالصلح لاشفت مخطين
والناس قدر اعقولهـم مستواهـم
وعند العوارف ماتميـل الموازيـن
عند الرجـال اللـي بعيـدٍ مداهـم
يمشون مع سلم العرب والقوانيـن
نقل النقيلـي مـا يكـدر صفاهـم
أهل العقول بكـل حالـه حكيميـن
يردهـم عـن كـل زلـه حياهـم
خوفٍ على السعمه ولاهم غبييـن
الله على طيـب المكـارم قداهـم
في منهج الدنيا وفي منهج الديـن
تبين اشارات الوفـاء مـن نباهـم
قواعد الشيمـه عليهـا حريصيـن
كرام السبال اللـي يـذري ذارهـم
لعلهم دايـم علـى العـز حييـن
اذكر مكارمهـم ولا أنكـر جزاهـم
لو كان عن مدح الحويفي غنييـن
أهل الوفاء والطيب يذكـر ثناهـم
واضعاف الأنفس مالهم بالفخر شين
والناس يعرف طيبهم مـن رداهـم
للشمس نور وللحقايـق براهيـن
والله خلقهم مـن تـراب وبناهـم
وخلق لهم من كل الأنواع زوجيـن
وارزاقهم من عند خالـق سماهـم
فقيرهم واللـي رصيـده ملاييـن
الدايـم الله والفـنـاء منتهـاهـم
وكلٍ وما حصل من الشين والزيـن
عالـم سرايرهـم وعالـم خفاهـم
يحكم ولا تحكم عليـه السلاطيـن
شكّـل طبايعهـم ونـوّع لغـاهـم
وانشأ لهم فوق البسيطة عناويـن
ومن فيض جوده وامتنانه عطاهـم
وسخر لهم صم الصخر والحياوين
لاهو بحاجتهـم ولا فـي رجاهـم
وعنده حساب المهتدي والمضليـن
بلغّهـم احكامـه بهـدي انبياهـم
المهتدي واللي عن الحق عاصيـن
ربٍ ليـا نـادوه يسمـع نـادهـم
الواحد الفرد الصمد منـزل الديـن
ويعلم تواضعهـم ويعلـم قساهـم
واللي على هدي النبي مستقيميـن
وعصاة خلق الله جهلهـم عماهـم
اعقولهم تلعب عليهـا الشياطيـن
ينسون خوف الله وهـو مانساهـم
رب الفلق منزل تبـارك وياسيـن
ندعي لهـم بهدايـة الله عساهـم
يهديهم اللي كوّن آدم مـن الطيـن
اللي لمرضاتـه رسولـه دعاهـم
وصلوا على الهادي شفيع المصلين
|
العضو الأكثر نشاطاً هذا اليوم 
العرض العادي
