الندى دمع الورود

الندى دمع الورود ان فارق الطير المهاجر

والمطر دمع الغيوم اللي يزيد الصدر ضيقه

والعطش صوت السموم اللي لفح وجه المسافر

ان قدر يمنع لهيب القيض كيف يبل ريقه

والعنا نبض القلوب اللي تعلق بالحناجر

والجفا لا صار صدر الهم يتزايد شهيقه

والحزن لا مرني طيفك خيال وحلم عابر

دامك أثبت ان طيفك حلم ما ودي افيقه

ليه رحت وليه تنزع من يدي غصن المشاعر

ايه رحت وصار قلبي يحتمل مالا يطيقه

في غيابك لو تشوف القلب متماسك وصابر

انكسار الضوء في وجه المساء يلغي بريقه

لا تصدقني ترى واقسم بربي كنت اكابر

شف ملامح صورتك للحين في عيني الغريقه

لا غمض لي جفن يحلم فيك يبقى جفن ساهر

واعتبر هذا وفا من شخص ما ينسى رفيقه

ما يموت الورد لو نسقيه من دمع المحاجر

لو نسيت الورد مره ما قدرت انسى رحيقه

كيف حالي في غيابك؟رد يا صمت المقابر

بشره جرحه عرف يختار ما ضيع طريقه

رسمة المظلوم تصفع وجه جدران العنابر

لا متى وانا أمسح الاعذار في وجه الحقيقه