كلّ يوم يابري حالي تجيب العيد فيّه

[poem=font="simplified arabic,4,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
العنيد اللي برى حالي مع حظٍّ عنيد=من قبل عيد الاضحى عيـّد .. وجاب العيد فيـّه
والضحية .. سنـّة الله كل عيدٍ للعبيد=مير كيف يضحّي اللي صار باسبابه ضحيـّه
كلّ خل يماري بغالي الهدايا .. كلّ عيد=ولابه أغلى من عيوني .. وأخذها مبطي هديّه
لو حمى فتنة ( زبيده ) وجه ( هارون الرشيد )=ماعطت كثر الهدايا .. ساق ( بلقيس ) الحميّه
والشعر ماهو بورث ( معاويه ) لأبنه ( يزيد )=كلّ شاعر له عشـٌق .. ولكلّ عاشق شاعريّه
والأذيـّه هي رصيدي في الهوى .. وامحق رصيد=وويل من مثلي رصيده في الهوى صار الأذيّه
قسمة الله في عباده .. هذا شقيّ .. وذا سعيد=واحدٍ يلقى عسل سدره .. وواحد سمّ حيه
وعاذل يجزا سلامي والتحيّه بالجحيد=وش أبي به ... لا سلام الله عليه .. ولا تحيّه
وش له وطفل مـَلاَ صدري بالنشيد=يركض وياطا ضلوعه .. من هنيـّه لـَـ .. هنيـّه
والله أني فيه ماطاوعت .. زيد ولا عبيد=لو وقف من دوني ودونه حرس وبوارديه
احترق له .. فيه .. لو ناره تقولْ هلْ من مزيد=وكم حطبني الشوق فيه وصرت له جمره غضيـّه
أتباطا جيـّته .. وإن جاء قبل وعدٍ أكيد=وأتنشّد روحته من قبل يقبل .. عن مجيـّه
مثل من ضيـّع شداده والمطيـّه باْثر صيد=كسّر شداده لصيـدٍ مجفل وخلّى المطيـّه
أشعل بين العذارى لامشى .. كنـّه وحيد=قبلة الله ماتقول الاّ حمام الراعبيه
اسمع ( برمان ليّه ) يوم يطرا من بعيد=ويوم شفته قلت .. يالبيـّه ( يارمّان ليّه )
الله اقوى منه ماملّ النظر طرفٍ سهيد=وفيه نظراتي تهاوش ذيك .. تلعن جد .. ذيـّه
وشبّــها حرب وحميّا بين شريان ووريد=كل عرق ٍ دونه بـ ( جنبيته .. والبندقيـّه )
ووالله انـّه كل مايخزرني بعين الفريد=ضعت به كلّي .. ورحت لعينه أدوّر .. عليـّه !!
البلا اْن بطرف عينه مثل سيف ( ابن الوليد )=كم تخطّفني بحدّ صبيّها سيف المنيـّه
طالما اْن اللي يموت من الغرق يكتب شهيد=ليه ماغرق وسط نونه أو على شاطي صبيّه ؟!
له جديل مااستفز الاّ .. ابجديات القصيد=ليا انتثر .. جتْك القصايد .. ابجديه .. ابجديه
وكلّ ماعض الشفّه رحت من ضدّ لضديد=مادري أموت بثمانه .. أو على جمرة شفيّه
إن سكت .. سولف ربيع أنفاسه وذوّب جليد=وإن تكلّم .. ينثر الدنيا .. حدائق بابليه
وإن تبـسّم .. حطّني بين الضعيفه والشديد=وإن ضحك .. ناضت بروقه بالمزون العقربيـّه
وإن تمايل .. من ليانة عوده يلين الحديد=وإن تثنّى .. شفت وشلون الخوي يظلم خويّه
وإن تهزّع .. كلّ غالي من تهزّاعه .. زهيد=وإن تخطّى .. قلت .. لا بالله قِذَتْ عيني يديـّه
وإن وقف عنق الكحيل وقذلة عبيـّه وجيد=وإن مشى قلت تخسا بنت الكحيله والعبيّه
رحت أبشكي له طعونه .. سلهم وقلت له زيد=أنت راعي الجود وأبخل طعنةٍ منك أجوديّه
سوّ ياعذب الثنيّه وأفعل بي اللي تريـد=مير أنا في وجه ربي منك ياعذب الثنيّه
قيدتني فيه كلمة ( يابعد حييّ ) بقيد=وأستباح بها خضوعي .. لارحم ميته وحيّه
كنت أعدّ بحروته من ( واحد لميـّ100ــه) .. وأعيد=في صباح العيد .. وأنا أعدّ من ( واحد لميـّ100ــه )
جاء يعايدني وهو يختال في ثوبٍ جديد=قال :- أظنّك ناسي أن اليوم هو عيد الضحيّه ؟
قلت :- وش تفرق ثلاث سنين معك أعيش عيد=كلّ يوم يابري حالي .. تجيب العيد فيّه
[/poem]