الضلع القصير

المزاجـيّـه ماتـدعـو للتـشـاؤم والتطـيّـر
هذا انا من يوم بإحساس الغلا المذكـور جيتـك
وش طرى ؟! يامندهش من بعض طبعي ومتحيّر
لايكون اخطيت فـي حقـك وخرّبـت اتيكيتـك
كـان متغيّـر فانـا مانـيـب قـابـل للتغـيّـر
ابتديتـك فـي دروب العاشقيـن ولا انتهيـتـك
مبدأي واضح معك في الحب من غـرّة قصيّـر
ان نسيتـك ماذكرتـك وان ذكرتـك مانسيـتـك
يـوم سلّمتـك زمـام الـروح والقلـب متذيّـر
من دخوله عالم العشّـاق بإسمـك.. وآآآآه ليتـك
شفتني في كل ساعـه عشتهـا وشلـون اجيّـر
كل نبضي يمك ليـا قلـت ياعمـري .. فديتـك
كنت اقاوم كل جرح .. وكل عوق .. وكنت اسيّر
المشاعر مرحله ..لامرحلـه .. ليـن احتويتـك
يا مطوّل فـي غيابـك مكرهـا ً منـت متخيّـر
اكذب ليا قلت لـك مافيـه ليلـه مـا احتريتـك
نفسك ليا راودت نفسـك علـى المسيـار سيّـر
الجوارح كلهـا رهـن اصبعـك والبيـت بيتـك
لك مكانه في المكان اللي ورى الضلع القصيّـر
اصلها شعبيّتـك ..وفروعهـا قـدرك وصيتـك
العطا خيـر المحبـه .. والجفـا ملعـون خيّـر
في المحبه .. واشهد اني يـوم حبيتـك عطيتـك