علمتني المترفـه وشلون احس ..اني ثـري

علمتني المترفـه وشلون احس
اني ثـري
نصبّتني عرشها...ونصبّتها
عرش الحصير

بس انا علمّتها بصدقي واصالة
جوهـري
كيف يحتاج الغنّي لخبزة
إحسـاس الفقيـر

اشعلي يانجمـة العشـاق ليلك
واسهـري
امشي بنفس الطـريق وجرّبي
نفس المصيـر

وبلّغي صـادق تحياتي لحزني
وقهــري
يوم كان الشـوق لايرحم
ولاعندّه ضميـر
ويوم كنت أخـاف مايعجب
عيونك مظهـري
وانحني منشان مايفضحني
الثـوب القصيـر

اسألي كل الشـوارع والحدايق
واظفـري
كيف كنت بكل يوم اهـديك
باقـة ورد غـير

كنت أوقّف بآخــر الشـارع
واراقب واحـتري
لين يهدا الجـو وانقّي لك من
الــورد النظيـر

كل ما امر بْرصيـف يقول
خلّصـت زهــري
وكل ما اقطـف ورده اللي
جنبهـا منها تغيــر.!!

اسـألي شبـاكك الـــوردي..
وش اردى بنظـري.؟
لاقعدت ألـف قبلة بيتكـم كني
خفيـر

كنت احاصر غــرفـتك بجيوش
عينـي وبصـري
كن لي عش ٍبشبـاكـك وكن
العيـن طيـر

آآآخ لو عشتـي انتظاراتي
وشفتي منظـري
لاسألني جـاركم وش بك هنيّا
تستـدير

والمصيبه دايـم" عـذري مضيّع
دفتــري
يبتســم ويروح وانامصدّق انْ
عـذري خـطير

وبس يدخل اسمعه يضحك
بصـوت ٍمُزدري
حنّا بالعطلـه وصـاحبنا على
الدفتـر سهيـر

اسـألي الجـدران عن خط ٍعجز
لاينقـري
علّم الجدران مالم تعلم فبوح
الضميــر

اسـألي امــي عن كدر بالي
وضيقة خــاطري
لاسـألتني ياوليدي وشبك ورد
الزفيــر

السـواد اللي على جفوني من
آثـار سهــري
لوعـرفتي كيف كحّلنـي به
الليل المريـر

كنت لاجا الليل قلّطته على
الجفـن الطــري
لين نصّبني السهــر لعيون
خـلق اللـه سفيـر

وان نفاني للسهر يامتـرفه
حكم قـدري
هالسهـر ياما نفى لي من
ضحاياه الكثيـر

والبيـاض اللي تشوفينـه تنامى
بشْعـري
من مظـاليمـه هـلال اعرج
ونجـم ٍمستـدير

يارُفـات الطيش في تابوت
الأحــلام البــري
من خذلني بالبدايه كيف اصونه
بالأخيــر

مابقى لك غير بعضي
واستميحـك باكثـري
ضاع مثل النـور لما ضاع عن
عيـن الضــرير

مثل ماضاعت عصافيرك عن
اغصـان شجـري
مثل ماضاع الأمـل عن صبح
شبـاكي الصغيـر

ومابقى لك غير سالفتي
وشعـري وصـوري
سولفيهن للشمـوع الحمـر
والفــرش الوثيـر

للستايـر...للأســاور...للحـاف
السكّــري
للهـدايا..للتحـف..للمزهـريّه
للسـريـر

واوعـدك وقت الحصاد اتجاهل
الجـوع العُـري
بس لاجل اكتب حروف اسمــك
بحبـات الشعيـر

ولاجل اعلّم هالزمـان المستبد
العنصري
كيف يحتاج الغنـي لخبـزة
إحسـاس الفقيـر





قصيده أعجبتني


ونقلتها هنا