يسكنّي اليا غفيت بوحدتي .. واسكنْه

غلاك نعمه من الله .. والزمن جاحد ,
يا من سرقت آجمل ايامي من سنيني ,
ماهو ضروري نكون [ 2 ] في [ 1 ] ,
مجرد : اني على بالك .. يكفيني ,

الشعر .. مثل الغريب اليا جفاه وطنْه

والشاعر .. بلاد واحساس وشعور وحنين

يسكنّي اليا غفيت بوحدتي .. واسكنْه :-

لا احتاجني في فضاه اطلق سراح السجين

استعذبه كثر ما اتعب فيه واتعب منْه

وابحر معه للجدي وسهيل والفرقدين

لو اني اشوفه اقرب حاجة ٍ ممكنه

واتنفسه .. مثل من يتنفس الاكسجين

لكنّي احيان لا راهنت به .. ما اضمنه

مواقفه معي .. يحفظها شريط السنين

يخونني .. لو وراء الهقوات اتلّ ارسنه

الا ليا جاء مجالك يالثمين / الثمين

يزين معناه فيك .. ويستقيم لحنْه

ويصير في راحة اوراقي مابين اصبعين

حتى انه بمملكتك يمارس الهيمنه

ومشاعري كنها انصار الحسن والحسين

وانا القمر كل ماشفت السحاب احضنه

اذكرك واقول يخلق من شبهك ( 40 )

من ذاق طعم الهوى بعد ضماه .. ادمنه

معذور .. والعمر مره ماهو بمرتين

راعي المحبه على متنه يشيل كفنْه

مايدري .. اخر دروبه تنتهي فيه وين !

هو يحسب ان العرب .. ما احد ٍ بداري عنْه

لو ينصحونه .. يطالع فيهم بنص عين

القرب يامصعبه .. والبعد يامشينه

بالمختصر ماهو ب.. طيّب من الحالتين !

حتى نسيم الهوى البارد لا هب .. اشطنه

كنه محمّل .. بريح الفل .. والياسمين

انا كذا .. والغلا شامه شبيه يمنْه

يامجدد ٍ في غيابي .. كل جرح ٍ دفين

اغيب واعيادنا ماهيب ف.. الازمنه

اعيادنا .. كل يوم .. وكل لحظه وحين

ماهو ضروري نعيّد عيد راس السنه !

من فضل ربي علينا .. دايم معيدين

نعمه ..والانعام عنها : تعجز الالسنه

( الحمد لله .. رب العالمين اجمعين )

ياكثرك ب.. قلبي وياقل غيرك !
ومهما حصل ما ازود غيرك وانقصّك !
ان غبت عني / كثّر الله خيرك
حتى لو انك غبت ماني ب.. مرخصك