مع التحيه والتقدير لكل العابرين
كنت احسب ان العقل با الثقل مربوط=اثري خفيف الوقت فك ارتباطه
ما كان في بالي علامات ونقوط=حتى لقيت الكاش فوق البلاطه
رحت برضا روحي على جو مغلوط=وقابلت با التيار ذروة نشاطه
زاحمت فيه وجيت ضايق ومضغوط=فوق البسيطه وانكسار البساطه
وبين البسيطه والبساطه ومبسوط=ثارة عواصيف الخطا والعباطه
سوّت على السيره مسارات وخطوط=ومن الوحل يصعب عليك التقاطه
زنجير متعاوج وزنجير مفروط=وراع الابط مجهول وش تحت اباطه
بشت الزمن كنه مع الوسط مشعوط=وصعبٍ على الابره ترقّع مخاطه
الهاويه فيها انحدارات وسقوط=من غير لوحات انتبه للاحاطه
لكن بقي شيٍ على البال محطوط=راس الجبل ما ينثني للهباطه