الحب ما فيه تهديد

هددني خلي بالجفى في غيابه ..
وهددني لو اسأل ينفذ كلمته ..
ماخفت متعود من اول عذابه ..
لكن انا وقلبي احترمنا رغبته ..
***
ألبسه بالشوق لبسه ثيابه ..
وهوه مع ظلمه يدور جفلته ..
أنا أزين له حياته .. شبابه ..
وهو يدور كيف تنبت حسرته ..
***
الحب يرفعنا ويحسب حسابه ..
ويرتز هذا الحب ومحلا رزته ..
نجي ندور كيف نلقى خرابه ..
كأن مـوت الحب يشــبه لذته ..
***
والله انا ما ارجي عطاه وثوابه ..
إن كـان فيـها ذلتي أو ذلته ..
لكن جرحي من خبال الصحابه ..
وخصوصا اللي هالحسد من فطرته ..
***
ياعاذلي فرصتك غن الربابه ..
قم له تكسب من وراه ابنعمته ..

***
قلبي انا دايـم قســيم اغترابه ..
ولاهو جديد اني أجبّر كسرته ..
معتاد اهني القلب لو جا عذابه ..
عسى يقوم اقوى ويبري علته ..
***
بمشي حياتي ومثلي ينسى مصابه ..
ما دام هـذا هـو وهذي خـطته ..
وباقوم من جرحي وانا اكثر مهابه ..
والجرح هوه الجرح ماهو بكثرته ..