اكفر ذنوب الخلق معقولة ؟

[poem=font="simplified arabic,4,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
معقول .. اغيّر عقول الخلق .. واقنعها ؟=ماهوب معقول .. ياللي قال .. معقوله
ياخي .. انا يالله بنفسي اطوّعها=مالي على الخلق لا حكم .. ولا طوله
يالأجودي لو بنفسك شيّ موجعها=هالوقت غيّر كثير نفوس .. بسهوله
نفس ٍ ذليله .. تشوف المال .. يرفعها=ونفس ٍ عزيزه .. تركها الفقر .. مذلوله
ورجل ٍ يجيها اللحّاف .. بطقّـة اصبعها=ياللي يمدّد بقدّ لحافه رجـوله
اثبت لك إنّا مع انفسنا .. نخادعها ؟=وانّا نعيش الهزيمه .. كنّها .. بطوله؟
نقول دنياك لو ماطاعتك .. طعها=وهي عمرها ماتطيع الحيّ .. بميوله
وبإسم الرجوله عقب مالوقت شيّعها=قمنا نكابر بوقتٍ .. مابه .. رجوله
واحلامنا كذبةٍ عـشنا عشان نرقّعها=ونضحك علـى بعضنا بأحلام .. مقتوله
بإيدين مشلوله .. بنبني مرابعها=بالله .. من قد بنى بإيدين مشلوله؟!!
والنـيّـه الطيّبه من طيب منبعها=وكلّن على قدر طيبـه .. يسرج خيوله
مثل القصيده يدلّك طيب مطلعها=عنها .. وتبقى بكل لسان مقيوله
مانيب مهبول يعشق بنت ضيّعها=ولا سالفة عاقلٍ هايم بمهبوله
السالفه كان ودّك تعرف اسمعها=ياللي تلوم الشاعر اسمع لقوله
زرعت ورده .. وليتي قبل مازرعها=في روض مشتل نشدت الروض منهو له؟!!
ويوم ازهرت شفت راعي الروض .. يقلعها=قدّام عيني وانا بإيدين .. مغلوله
وقّفت .. مذهول وعيوني مدامعها=تشهق بدمع ٍ وقف .. بعيون مذهوله
صوّت .. ياعمّ .. تكفا .. بس اطالعها=وأشحذ وجيه العرب واقول : قولوا له
عين ٍ تجوع السهر من شان تشبعها=ياتنعمي .. يا تخلّي النفس معلوله
قالوا تبيها نصيـحه .. بندقك بعها=ماهيب صوب الجفول ولاهي بحوله
وامسيت .. وانا اطفي الشمعه .. وأولعها=في حروة الفجر .. مير الليل .. ياطوله
إن لمت عين ٍ .. بكتها الثانيه .. معها=وإن جيت ابانسى .. ولاهو شيّ .. ياهوله
من عقبها النفس طاري الورد .. يفجعهـا=وألعن ابو الورد .. كلّه .. واعشق ذبوله
وآخر سؤال ٍ .. حرم هالعين مضجعها=وأقفت .. تشوف الحقيقه شبه مجوله
ياخي .. اكفّر ذنوبي .. يمكن ابلعها=لكن اكفّر ذنوب الخلق .. معقوله؟!!
[/poem]