الرموش الطوال

ياصاحبي حطني بين الرموش الطوال
هذي هي الرغبه اللي ودي آصلها
ابي عيونك تنسيني هموم الليال
اعيش مع غيرها واسج في ظلها
انا حظوطي حدتني يالقراح الزلال
لا ارد عدودك ولا اجيها ولا اعلها
مامعك حيله وانا مافي يدّي احتيال
حسبي عليها وحسبي لي وتب ٍ لها
الله من كلمة في خاطري ماتقال
واخاف ما اقولها واموت من غلها
والوقت مثل الرشا والبعد مثل المحال
والشوق يطوي حنايا الروح ويفلها
ياشعر وانت الوسيله والهدف راس مال
قل لليتيمه ليا واجهتها قلها
اذل شي على الدنيا دموع الرجال
وانا عيوني تراودني على خلها
كم لي وانا اسامر القمرى واخيل الهلال
وارعى نجوم السما واعدها كلها
صابر وراضي على جور الحمول الثقال
من دقها لين اصب العمر في جلها
بعدك ذبحني وهمك مثل دم الغزال
ياصبر عيني على بعدك وياملها
يا كثر ما اذن وكبّر فالحنايا بلال
على هجوس ٍ تمر الصدر في حلها
تحن حن الرعد في مدلهم الخيال
وتضم حدب الضلوع العوج واتلها
واغيب معها وكني في طوال الجبال
في عزلة ٍ ترفع العشاق وتذلها
والناس لو تونس الحره على كل حال
ماكان تجرد سيوف اللوم وتسلها
وانا ولو ان مالي في حياتك مجال
اعيش ذكرى دروب العشق وادلها
لو تكثر الناس شرهتها يمين وشمال
مردها تشرب الشرهات وتبلها
لازال حبك على قلبي جيوش احتلال
العقل راضي بها والروح تذعن لها
وامانتك حطني بين الرموش الطوال
هذي هي الرغبه اللي ودي آصلها
واللي يعقد الحبال يحل روس الحبال
ماغيره اللي ليا من عقدت يحلها!