غنيت يوم الفرح زانت مماشيه

تلقيت دعوة الاستاذ والأديب الكبير / فهد الزعيزع وهو زميل عزيز وأخ ودائما نتحاور مع الشعر في عملنا وها أنذا أضع بين أذواقكم أولى مشاركاتي والتي اتمنى أن ترقى لأذواقكم

غنيت يوم الفرح زانت مماشيه
أوسع الصدر من ضيق الليالي
في صحصح(ن) ماحدن قبلي مشى فيه
عقب السنين القديمة والخوالي
مسرح لماضي عتيق الكل ناسيه
ماتوا رجاله زمان ولايزالي
وجه يعيد الزمان ويرسم وجيه
على سفوح العوالي والتلالي
لوهو حزين ونهاره ضيقه وتيه
ماقال ياعزتاه ولاشكالي
جيته وانا الضيق حاديني وحاديه
وسجيت رجلي معاه وراق بالي
يامحلا المشي في ضلعه وواديه
وخوة خويٍ(ن) من النمات خالي
مافكروا بالرصيد ريال وجنيه
ولافكروا وش تقول ام العيالي
اثنين والصقر والجيب ومماسيه
في برقة(ن) تحت ضلع وفوق جالي
ياحيهم من عيال وحي طاريه
اللي لياصاد ماصاد الهزالي
حر(ن) ليا هدّ كن الموت حاديه
كنه رصاصه وباخرها اشتعالي
مخلابه ليا بطش بالصوت توحيه
كنه ينادي عليك بصوت عالي
الله يبيحه يامكثرهن حباريه
والله يديمه لزيزوم الرجالي
مايلحقه لاملام ولا مشاريه
وافي وكامل ولله الكمالي
وليا اظلم الليل شب النار تسريه
وهات القصايد وركز بالجزالي
اصحاب محدن يغير من مباديه
ماهي بصحبة يقول وذاك قالي
طبع بدوي(ن) يعز الجار ويجيه
مايقصر حبال وصله دون غالي
ورث(ن) من العود لايمكن يخليه
لو بدل الوقت جلده مايبالي
وصيته للخوي حذرا تخليه
لو صار بالوقت ثورات وقتالي
هذا ربيع الخفوق ومانسميه
في طلعة البر في اليوم المثالي
لعل نوّ السحاب الغر يسقيه
الصحصح اللي من العربان خالي
ويزهرّ وتلقى ام سالم في فيافيه
تصدح وهذا امناي وراس مالي
واقبل تحيات قلبي مع تعازيه
يامن لحاله وانا جيته لحالي
جيته بضيق المدينه قال مابيه
يامكثر الضيق لو صدري شمالي
ابديت شي(ن) من اللي صار مخفيه
على حسب مالقيت ومابدالي

شعر : جميل مساعد الرشيدي