خصلتين وقمر

الشبابيك يزعج صمتها بوح ناي
والليالي مداها خصلتين وقمر


كنت أرتّب نجوم البارحه في سماي
لين طاحت من عيون الفضا والقدر


وأصبح الحلم يا نفسي .. ويا منتهاي
وجهه أبعد من المأمول والمنتظر


وش بقى بس نحلم فيه يا مبتغاي
والأماني تثاوب بين همّ وكدر


ودّي أعتق سهر عيني وأحرر شفاي
لين ماعاد يبقى في عيوني سهر


الظروف أسرفت بي لين ضاقت معاي
طفلةٍ تزرع أرصفة الأماني زهر


إيه طفله ولكن ماتحقق مناي
أرمي اشباك وصلي وانتشلها هجر


والليالي منافي ماتحس بعناي
كل ليلة يموت بكفها لي عمر


آآآه لو كان حظي فيه حشمة بكاي
كان ماشفت للحرمان فيني مقر


والصواب إن تجمّل باكتشافه خطاي
كيف أبلقى له أبلغ من سنيني عذر


لو أرتب طريقي ماترتب خطاي
ليه أخطط لحلمي موعدِ للسفر؟


ياجنوني ترفّق مابقى من مساي
غير نجمٍ سرقته من يدين الفجر


عطني الصبح أضمّه لين يشعل دفاي
وهدهد عيون ذابت من شموع السهر


ودّي اغفى بهـ الليلة بلا صوت ناي
والفرح في جبيني خصلتين وقمر.!



لذوائقكم الفاخره